Elıseı saraıy Parıjde Ýkraına boıynsha ótken kelissózge oń baǵa berdi

ASTANA. KAZINFORM – Elıseı saraıynyń málimdeýinshe, beısenbi kúni Parıjde AQSh-tyń joǵary laýazymdy ókilderiniń qatysýymen ótken Ýkraına boıynsha talqylaý «óte tamasha» ótti, dep habarlaıdy Kazinform menshikti tilshisi. 

Bir kún buryn Frantsııa prezıdenti Emmanıýel Makron Parıjdegi Elıseı saraıynda AQSh memlekettik hatshysy Marko Rýbıony qabyldady.

Frantsııa amerıkalyqtar, ýkraındar, frantsýzdar, brıtandyqtar jáne nemister arasynda «buryn-sońdy bolmaǵan» formatta Ýkraınaǵa qatysty «tamasha pikir almasýdy» quptady. Kezdesý Kıev pen Máskeý arasyndaǵy «berik beıbitshilik» týraly «kelisimge qol jetkizýge múmkindik berdi, dep atap ótti France24.

— Búgin Parıjde biz eýropalyqtar qatysyp otyrǵan oń protsesti bastadyq, — dep quttyqtady Frantsııa tóraǵalyǵy E.Makron, AQSh Memlekettik hatshysy M.Rýbıo jáne Donald Tramptyń arnaıy ókili S. Ýıtkofpen birqatar kezdesýden keıin.

Osy bes eldiń elshileriniń jańa kezdesýi kelesi aptada Londonda josparlanǵan, oǵan sondaı-aq S. Ýıtkoff ta qatysady. 

Makron keńesshisiniń aıtýynsha, Ýkraına men Eýropanyń resmı tulǵalary «Prezıdent Donald Tramptyń Ýkraınadaǵy soǵysty múmkindiginshe tezirek toqtatý maqsatyn» jáne «atysty múmkindiginshe tez arada tolyq toqtatý qajettiligin» «ortaq qoldaıtynyn» atap ótti.

— Atysty toqtatý kelisimi «Reseı basyp alǵan Ýkraına aýmaqtaryn eskere otyryp, qazirgi jaǵdaıdaǵy baılanys syzyǵyna (maıdan syzyǵy) negizdelýi» tıis, — dep málimdedi Elıseı saraıy. 

Memlekettik departament málimdemesine sáıkes, AQSh Memlekettik hatshysy Marko Rýbıo keshkisin reseılik áriptesi Sergeı Lavrovqa telefon shalyp, ony Parıjdegi kelissóz týraly habardar etip, eger eki tarap kelisimge kelýge mindettelse, «beıbitshilik ornaýy múmkin» dep basa aıtty.

Eske sala ketsek, naýryh aıynyń sońynda Parıjde Emmanıýel Makron men Vladımır Zelenskıı kezdeskenin jazǵan bolatynbyz.