Elıseı saraıy «Parı Sen-Jermen» komandasyn qabyldady

ASTANA.KAZINFORM — Eýropalyq klýbtyq fýtboldyń bas júldegeri «Parı Sen-Jermen» jeksenbi kúni Parıjge keldi, dep habarlaıdy Kazinform agenttiginiń tilshisi.

Kúndiz fýtbolshylar senbi kúni jappaı narazylyq pen polıtsııamen qaqtyǵys bolǵan Frantsııanyń eń áıgili kóshesi — Elıseı alańyna bardy.

Frantsııa prezıdenti Emmanıýel Makron jeksenbi kúni «Parı Sen-Jermen» fýtbol komandasyn Chempıondar lıgasyndaǵy tarıhı jeńisimen quttyqtaý úshin prezıdent saraıynda qarsy aldy. Makronmen kezdesý aldynda PSJ oıynshylary tóbesi ashyq avtobýspen Elıseı alańyn aralady.

Aldyńǵy kúni Mıýnhende ótken týrnırdiń fınalynda komanda «Interdi» 5:0 esebimen jeńgen bolatyn.

Sonymen qatar, senbi kúni elde komanda jeńisin toılaý kezinde eki adam qaza tapty. Polıtsııanyń habarlaýynsha, Daks qalasynda 17 jastaǵy jasóspirim pyshaqtalyp óltirilgen.

PSJ jeńisin toılaý kezinde skýterin kólik soǵyp, taǵy bir áıel qaıtys boldy. Eki ólimge qatysty tergeý amaldary bastaldy.

Frantsııanyń ishki ister mınıstrligi de Parıjde 18 polıtsııa qyzmetkeriniń jaralanǵanyn jáne júzdegen adamnyń qamaýǵa alynǵanyn habarlady.

Emmanıýel Makron Elıseı saraıyndaǵy komandamen kezdesýde PSJ jeńisin toılaý kezinde oryn alǵan oqıǵalardy aıyptady.

«Sońǵy birneshe saǵatta bolǵan oqıǵany eshteńe aqtaı almaıdy, qatty qaqtyǵystarǵa jol berilmeıdi», — dedi ol komandany quttyqtamas buryn.

Aıta keteıik, Frantsııada krıptovalıýtalyq bıznesmenderdi urlaý isi boıynsha kúdiktiler qamaýǵa alyndy.