«Elıseı men Aqorda arasy jaqyndaı tústi» - respýblıkalyq basylymdarǵa sholý

Májilistiń keshegi jalpy otyrysynda «2011-2013 jyldarǵa arnalǵan respýblıkalyq bıýdjet týraly» zań jobasy biraýyzdan maquldanyp, elimizdiń bas qarjylyq qujaty Senatqa jiberildi. «Alash aınasy» gazetiniń jazýynsha, otyrysta basqa da mańyzdy zań jobalary qaraldy. Sonymen qatar tómengi palata depýtattary qaýzaǵan mańyzdy máselelerdiń biri - oralmandar jaǵdaıy. Rozaqul Halmuradovtyń aıtýynsha, «Nurly kósh» baǵdarlamasy aıasynda Shymkenttegi «Asar» yqshamaýdanynda oralmandarǵa arnalǵan 1725 úı salynyp jatyr. Oǵan jalpy sany 19 myńnan astam adam kóship kelýi tıis. Olardyń 8 myńǵa jýyǵy mektep jasyndaǵy balalar eken. Al qurylysy keler jyly aıaqtalatyn 1200 oqýshyǵa arnalǵan mektepte úsh aýysymmen oqytqan kúnniń ózinde oryn jeter emes. Demek, 4 myńnan astam bala jan-jaqta oqýǵa mábúr bolady. Osyǵan oraı depýtat atalǵan aýdanda 1 mektep, 2 balabaqsha salýdy josparlaýdy usynyp otyr. Bul jaıynda «Alash aınasy» gazetiniń búgingi nómirindegi «Depýtat Úkimetke 19 myń oralmannyń armanyn jetkizdi» degen maqaladan bile alasyzdar.

Keshe elimizdiń strategııalyq áriptesi sanalatyn Frantsııaǵa Elbasy Nursultan Nazarbaevtyń eki kúndik resmı sapary bastalyp, Parıjde Qazaqstan basshysyn qarsy alýdyń resmı rásimi ótti», - dep jazady «Alash aınasy» gazeti búgingi sanynda jaryq kórgen «Elıseı men Aqorda arasy jaqyndaı tústi» degen maqalada. «Memleket basshysy sapar barysynda iri frantsýz kompanııalarynyń jetekshilerimen birqatar kezdesýler ótkizdi. Júzdesýler barysynda Qazaqstan-Frantsııa ınvestıtsııalyq yqtymaqtastyǵyn úlken aýqymdaǵy perspektıkalyq jáne ózara tıimdi baǵyttar boıynsha keńeıtý máseleleri talqylandy», delingen maqalada.

***
«Aıqyn» gazetiniń búgingi sanynda «EQYU-nyń bedelin qalpyna keltirýdegi Qazaqstannyń úlesi zor» degen taqyryppen suhbat jarııalandy. Suhbat berýshi QR Syrtqy ister mınıstrliginiń resmı ókili, Imıdjdik jumys basqarmasynyń bastyǵy Asqar Ábdirahmanov. Tilshi saýaldaryna tyńǵylyqty jaýap bergen resmı ókil: «Bir atap aıtar­lyǵy, tek qana EQYU-nyń sheńberinde sheshiletin máse­le­ler kóp. Bylaı qarasaq, NATO-nyń quramynda Reseı joq, UQShU-nyń quramynda AQSh joq. Alaıda olardyń arasynda qandaı da bir dıalog bolýy tıis qoı. Mine, EQYU osyndaı dıalog úshin asa mańyzdy oryn bolyp tabylady. Ári Qazaqstannyń osy dıalogqa aralasýyn, bitim­gershilik mıssııa­syn halyq­aralyq uıymnyń bizge degen senim artýy dep túsingen jón. ıAǵnı budan shyǵatyny, álem­degi iri, bedeldi memleketterdiń úkimetteri bizge senim artyp qana qoımaı, sol senimi arqyly bizdiń qol jetkizgen jetis­tikterimizdi moıyndap otyr deýge bolady», - deıdi.

Sondaı-aq «Aıqyn» gazetiniń búgingi sanynda «Gıtlerdiń sońǵy mekeni Antarktıda ma?» degen maqala basyldy. Maqalada Gıtlerdiń ómirine qatysty túrli derekter qamtylǵan. «Al 1945 jyly 2 mamyr kúni nemis tankteriniń qalqalaýymen keńes áskeriniń qorshaýynan sytylyp shyqqan júk mashı­nalarynda Gıtler bolyp edi. Ol Baltyq teńiziniń jaǵasynda ornalasqan Gambýrg qalasyna jetip, sol jerde kútip turǵan súńgýir qaıyqtarǵa otyryp, Antarktıdaǵa attanǵan degen derek bar. Bul oqıǵa ańyz ba, álde aqıqat pa, ázirshe ony eshkim naqty aıta almaıdy. Biraq áli talaı joramaldar jasa­lyp, derekter anyqtala jatar», delingen maqalada.

***

«Senat Tóraǵasy Qasym-Jomart Toqaev QHR Shyńjań-Uıǵyr avtonomııalyq ólkesi (ShUAÓ) Halyqtyq saıası konsýltatıvtik keńesiniń tóraǵasy Asqat Kerimbaıdy qabyldady», - dep jazady «Kazahstanskaıa pravda» gazeti búgingi nómirinde. Áńgime barysynda Halyqaralyq «Qorǵas» shekaralyq yntymaqtastyq ortalyǵyn paıdalanýǵa berý máselesi talqylanǵan. Senat Tóraǵasynyń pikirinshe, bul jobany júzege asyrý shekaralyq aımaqtardaǵy ekonomıkany qarqyndy damytýǵa, eki memlekettiń tranzıttik áleýetin paıdalanýǵa yqpal etedi. Sonymen qatar Q.Toqaev kezdesý kezinde qonaqqa bıylǵy 1-2 jeltoqsanda Astanada bolatyn EQYU Sammıtine ázirliktiń barysy týraly aıtyp berdi. A. Kerimbaı óz kezeginde Halyqaralyq «Qorǵas» shekaralyq yntymaqtastyq ortalyǵynyń qurylysy aıaqtalý kezeńinde ekenin jetkizip, ShUAÓ-de áleýmettik-ekonomıkalyq damý salasynda aýqymdy baǵdarlamalar júzege asyrylyp jatqandyǵy jaıly Senat tóraǵasyn habardar etken.

***

«Nur Astana» gazetiniń beısenbilik nómirinde Parlament Májilisiniń depýtaty Ashat Bekenovten alynǵan suhbat «Qazaq óz ishinen «búlingeli» tur» degen taqyryppen berildi. Suhbatqa elimizde qalyptasqan dinı ahýal arqaý bolǵan. «Alaıda, qazaq óz ishinen «búlingeli» tur. Islam arasynda jat pıǵyldy dinder keńinen qanat jaıa bastady. Ýahabshylar tárizdi el arasyna iritki salatyn aǵymdardy Úkimet der kezinde aýyzdyqtamasa bolmaıdy. Ýahabızmge, basqa da pıǵyly jat aǵymdarǵa qarsy belsendi kúrespesek, onda memlekettiligimizge, ulttyq tutastyǵymyzǵa qater tenedi», - deıdi depýtat.

***
«Astana aqshamy» gazetiniń jazýynsha, elordaǵa Azııa Olımpıadalyq keńesiniń delegatsııasy keldi. Uıymnyń Vıtse-prezıdenti Tımotı Fok bastap kelgen meımandar Astanada salynyp jatqan sport nysandarynyń jaǵdaıymen tanysqan. «Azııadanyń bastalatyn ýaqyty jaqyndap qaldy. Bul eleýli sharaǵa Qazaqstan óte belsendi daıyndyq jasap jatqandyǵyna kózimiz jetip otyr. Qysqy Azııa oıyndary jańa-jańa damyp kele jatqanyn eskeretin bolsaq, sizderdiń aıaq alystaryńyz bizdi qatty qýantty. Qazaqstannyń Azıada nysandaryn óte qysqa ýaqytta salyp bitirip qalǵanyna tańdanysymyzdy jasyrmaımyz», - deıdi T.Fok.