«Elińe kúlki syıla!» baıqaýynyń jeńimpazdary marapattaldy
ASTANA. 19 tamyz. QazAqparat - Qazaqstan Azamattyq alıansynda «Elińe kúlki syıla!» respýblıkalyq aktsııasynyń jeńimpazdaryn marapattaý rásimi ótti. Ol shara «Bolashaq búginnen bastalady» respýblıkalyq kampanııasynyń aıasynda QR Mádenıet jáne aqparat mınıstrliginiń qoldaýymen ótti, dep habarlady uıymnyń baspasóz qyzmetinen.
Eske sala ketsek, baıqaý jumystary úsh atalym boıynsha qabyldandy: «Kúlegesh» - balalardyń sýretteri, «Jastar energııasy» - jastardyń sýretteri jáne «Elime kúlki syılaımyn» - eresek adamdardyń sýretteri. Aktsııany uıymdastyrý komıtetiniń mekenjaıyna respýblıka kóleminen 1000-nan astam jumys jiberildi.
17 tamyz kúni aktsııa jeńimpazdaryn saltanatty marapattaý rásimin Qazaqstan Azamattyq alıansynyń dırektory Ildar Katenov ashty. Ol aktsııaǵa qatysýshylarǵa alǵysyn aıtyp, barlyq jumystar kóńil aýdarýǵa turatynyn jáne tóreshilerge tańdaý jasaý qıynǵa soqqanyn atap ótti.
Aktsııaǵa qatysýshylardyń barlyǵy alǵys hattarmen marapattalyp, baǵaly syılyqtarǵa ıe boldy (ipad, sandyq fotoapparattar, uıaly telefondar).
Qazirgi ýaqytta Qazaqstan Azamattyq alıansy Astana kósheleriniń birinde 100 úzdik jumystyń fotokórmesin uıymdastyrý jumystaryn aıaqtap keledi. Jaqynda ol jerden baıqaýǵa qatysýshylardyń sýretterin kórýge bolady.
