Elimizge jyl saıyn 14 mln adam kirip-shyǵady

ASTANA. QazAqparat – Qazaqstanǵa kelý men elden shetelge shyǵý protsesi jetildirilip jatyr. Tolyǵyraq Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy Іlııas Ispanov aıtyp berdi, dep habarlaıdy QazAqparat tilshisi.

«Qazaqstanǵa jyl saıyn 14 mln adam keledi jáne 14 mln adam shyǵady. Olardyń bárin toptastyra kele 13 baǵytqa bóldik. Ol baǵyttar jumysyn avtomattandyryp, elimizge kirip-shyǵatyn azamattarǵa yńǵaıly bolýy úshin «bir tereze» qaǵıdaty nemese mobıldi qosymsha arqyly qyzmet kórsetý jaǵyn qolǵa aldyq. Aldymen jumys qandas mártebesin berýdi avtomattandyrýdan bastaldy»,- dedi Іlııas Ispanov ortalyq kommýnıkatsııalar qyzmeti alańynda ótken baspasóz máslıhatynda.

Kóshi-qon komıteti basshysynyń málimdeýinshe, Qazaqstanǵa keletin jáne shetelge shyǵatyn azamattardyń maqsaty men merzimi boıynsha biryńǵaı esep júrgizý mindeti tur.

«Endi belgili bir qyzmet alý úshin ár memlekettik organnyń esigin tozdyrýdyń qajeti joq. Sondaı-aq, Qazaqstanǵa kelgen shetel azamattaryna medıtsınalyq kómek kórsetý, olardy tirkeý jaǵy da avtomattandyrylady. Eń bastysy elge kelgen azamattardyń zańdy buzbaı, quqyq buzýshylyqqa barmaýyn eskertemiz», - deıdi mınıstrlik ókili.

Sondaı-aq, brıfıng barysynda kóshi-qon máselesine qatysty birneshe jaıttar belgili boldy.

Atap aıtqanda, elimizge ınvestıtsııa quıǵan shetel azamattaryna ımmıgrant vızasymen qatar 10 jyl turýǵa ruqsat berilmek.

Búginde Qazaqstanda 14 417 shetel azamaty jumys istep jatyr.

Qazaqstandyqtardyń Ońtústik Koreıada eńbek etý máselesin ekijaqty kelisim arqyly zańdastyrý jaǵy qaralyp jatyr.

Aldaǵy ýaqytta qandas mártebesine qujattar Qazaqstannyń sheteldegi elshilikterinde qabyldanady.

Ońtústik Koreıaǵa jumys isteýge baratyn qazaqstandyqtardy aldyn ala daıyndaıdy. Olarǵa sol eldiń zańdylyqtary men tártibi úıretiledi.

Odan bólek, Eńbek mınıstrligi elimizge keletin bosqyndardyń mártebesi arta túsetinin habarlady.