Elimizge vaktsına jetkizýshi kompanııalardyń máseleleri qaraldy
ASTANA. QazAqparat - Otandyq 7 birdeı vaktsına jetkizýshi kompanııanyń preparattaryna qatysty másele «Atameken» UKP keńesinde qaraldy, dep habarlaıdy QazAqparat tilshisi.
2017 jyly QR Aýyl sharýashylyǵy mınıstrligi Veterınarlyq baqylaý jáne qadaǵalaý komıteti qutyrýǵa qarsy ekpeni jetkizýshi 7 kompanııanyń memlekettik satyp alýǵa jaýapsyz dep taný arqyly jáne aldyńǵy ýaqytta jetkizilgen veterenarlyq preparattardy aýystyrý boıynsha talap aryzben sotqa júgingen.
Aryz jazýǵa «Qazaq veterenarlyq ǵylymı-zertteý ınstıtýty» JShS júrgizgen veterenarlyq prepararattardyń sapasyna zerthanalyq synaýdyń teris nátıjeleri sebep bolǵan. Atap aıtqanda, «Vetbıofarm» JShS jáne QR AShM Veterenarlyq baqylaý jáne qadaǵalaý komıteti 2016 jyly 2 maýsym kúni jalpy somasy 98 mln teńgeni quraıtyn 1,3 mln doza kóleminde vaktsınany memlekettik satyp alý týraly kelisimshart jasasqan.
Osy rette Aýyl sharýashylyǵy mınıstrliginiń buıryǵyna sáıkes, memleket aýmaǵynda veterenarlyq ónimderdi aınalymǵa shyǵarý jáne paıdalaný zertteýlerdiń oń nátıjesi shyqqan jaǵdaıda ǵana ruqsat etiledi.
«Veterenarlyq baqylaý jáne qadaǵalaý komıteti taýardy qabyldaýdan keıin 9 aı ótken soń jáne 3 aı kelisimshart qoldaný merzimi aıaqtalǵannan keıin, Qazaq veterenarlyq ǵylymı-zertteý ınstıtýty vaktsınaǵa synaq júrgizip, onyń ımmýnogendi belsendilik kórsetkishteri boıynsha belgilengen talaptarǵa sáıkes kelmeıtinin anyqtaǵan. Sodan soń Komıtet fırmalarǵa veterenarlyq preparattardyń búkil partııasyn aýystyrý qajettiligi týraly habarlama jiberdi», - dedi Respýblıkalyq veterenarlyq jáne azyq-túlik qaýipsizdigi qaýymdastyǵynyń tóraǵasy Nurlan Týǵambaev.
Qaýymdastyq tóraǵasynyń aıtýynsha komıtettiń ýákiletti tulǵalary zerthanalyq zertteýlerdiń teris nátıjelerin bile tura, aldyńǵy ýaqytta qabyldanǵan preparattardy óńirlerge qoldanýǵa zańsyz jibergen, osylaısha veterenarlyq preparattardy qoldaný boıynsha bekitilgen erejeler buzylǵan.
«Buǵan qosa sot tergeýi kezinde Qazaq veterenarlyq ǵylymı-zertteý ınstıtýty JShS saraptamany júrgizý ýaqytynda ımmýnogendik belsendiliktiń kórsetkishin anyqtaý salasynda sáıkes akkredıtatsııasy bolmaǵany anyqtaldy», - dedi ol.
Astana qalasynyń mamandandyrylǵan aýdanaralyq ekonomıkalyq sot jáne Astana qalasynyń azamattyq ister boıynsha sot alqasy Komıtettiń talap aryzdaryn qanaǵattandyrýdan bas tartqan.
Alaıda QR Joǵarǵy soty sot aktilerin alyp tastap, fırmany memlekettik satyp alýdyń josyqsyz qatysýshysy dep tanydy.
«Biz qandaıda da bir sheshim qabyldaı almaımyz, biraq kásipkerlerdiń quqyqtarynyń buzylǵanyn kórip otyrmyz. Degenmen Joǵary sot sheshimi shyǵyp qoıdy, oǵan qarsy shaǵymdanyp ózgeris engizdirýge bizdiń quqyǵymyz joq. Óıtkeni, Joǵary sottyń sheshimin teris dep tanıtyn fýnktsııa joq, basqasha aıtqanda poezd ketip qaldy. Biz tek quqyq qorǵaý organdaryna basqa da memlekettik organdarǵa usynys qana aıta alamyz. Sondyqtan Bas prokýratýraǵa atalǵan komıtetke qatysty máseleni jáne jalpy komıtetke júıeli túrde tekseris júrgizýdi usynys retinde baǵyttaý kerek. Budan bólek, Ulttyq bıýroǵa da júginýdi usynamyn. Bul jerde memlekettik satyp alý jumysyn da qaıta qaraý kerek», - dedi «Atameken» UKP janyndaǵy kásipkerler quqyǵyn qorǵaý jáne sybaılas jemqorlyqqa qarsy is-qımyl jónindegi keńes tóraǵasy Qaıyrbek Súleımenov.
Otyrystyń nátıjesin qorytyndylaı kele, keńes tóraǵasy memlekettik satyp alýdyń tıimdiligi qyzmetkerlerdiń basqa da tıisti zańnama talaptarynyń oryndalýyna barynsha yqpal etetinin de aıtyp ótti.
Aıta keteıik, keńes otyrysyna atalǵan Komıtettiń ókilderi qatysqan joq.
