Elimizge syrttan keletin balalar oıynshyqtarynyń kólemi azaıdy

ASTANA. QazAqparat - Syrttan keletin balalar oıynshyqtarynyń sapasyz jáne qaýiptiliginiń anyqtalýyna baılanysty, ony jetkizý kólemi azaıtyldy. Bul týraly elimizdiń bas memlekettik sanıtarlyq dárigeri Jandarbek Bekshın málim etti, dep habarlaıdy QazAqparat tilshisi.

«Elimizge keletin qaýipti jáne sapasyz dep tanylǵan balalar oıynshyqtar sany 16,2% artqan. Osy jaǵdaıdan soń biz baqylaýdy qatań qolǵa aldyq. Búginde syrttan keletin sapasyz jáne qaýipti dep tanylǵan oıynshyqtardyń úlesi 47%-dan 8%-ǵa tómendetildi. Bul degenimiz shetelden keletin oıynshyqtar kóleminiń azaıǵanyn kórsetedi.  Jalpy elimizdegi balalar oıynshyqtarynyń 99% shetelden ákelinedi, onyń kóbisi Qytaı, Túrkııa, Ýkraına, Belorýs elderinen, qalǵan 1% ózimizden shyǵady», - dedi J.Bekshın OKQ-de ótken baspasóz máslıhatynda.

Odan bólek, bas sanıtardyń aıtýynsha turmystyq hımııa taýarlary, balalar men jósóspirimderge arnalǵan ónimder, jıhaz, kosmetıka jáne temeki ónimderine tekserý jumystary júrgizildi. Tekserý nátıjesinde tutyný talaptaryna sáıkes kelmeıtin taýarlardyń úlesi 21,4% quraǵan. Ol boıynsha 677 is qozǵalyp, 151 sot úkimi shyǵaryldy, odan bólek, 19,6 tonnadan astam ónim satýdan alynyp tastaldy. Jáne de jalpy somasy 56 mln teńgeden astam aıyppul salyndy, bul ótken jylmen salystyrǵanda eki ese artyq (2017 jyly 24,6 mln teńge).

«Jalpy júrgizilip jatqan jumystardyń nátıjesinde tutynýǵa sáıkes kelmeıtin taýar mólsheriniń serpindi tómendeýi baıqalady. Oǵan dálel sońǵy úsh jylda sapasyz dep tanylǵan taýarlardyń úlesi 30%-dan 13,4%-ǵa tómendedi», - dedi ol.

Buǵan deıin bas sanıtarlyq dáriger elimizde menıngokokk ınfektsııasynyń turaqty ekenin aıtqan bolatyn.