Elimizge sheteldik jumys kúshin tartý júıesi túbegeıli ózgeriske ushyraıdy
ASTANA. QazAqparat - Qazaqstanǵa sheteldik jumys kúshin tartý júıesi túbegeıli ózgeriske ushyraıdy. Bul týraly búgin Májilistegi «Nur Otan» partııasy fraktsııasy janyndaǵy Áleýmettik keńestiń sheteldik jumys kúshin tartý máselesi talqylanǵan otyrysynda Densaýlyq saqtaý jáne áleýmettik damý mınıstri Tamara Dúısenova málim etti.
Mınıstrdiń sózine qaraǵanda, búgingi tańda kóshi-qon jáne jumyspen qamtý máselelerine arnalǵan zań jobasy ázirlenýde. Atalǵan zań jobasy bir jaǵynan ishki qaýipsizdik pen ulttyq eńbek naryǵyn qorǵaýdy qamtamasyz etýge baǵyttalsa, ekinshi jaǵynan ekonomıkanyń kadrǵa suranysyn qanaǵattandyrýdy kózdeıdi. Bul rette kadr suranysy negizinen joǵary bilikti mamandardyń erkin naryǵyn qurý, jumys berýshiler úshin sheteldik jumys kúshin tartý úderisin lıberaldandyrý arqyly júzege asyrylmaq.
«Sonymen qatar, zań jobasy ózdiginen jumysqa ornalasý máselelerin, sheteldik mamandardy kvota men ruqsattan tys ózdiginen tartý sharalaryn qarastyrady. Bul baǵyt negizinen kvotadan tys atqarylady, alaıda sheteldik jumysshylarǵa ruqsattyń ornyna biliktilikke saı ekendigi týraly anyqtamalar beriledi. Aıta keterligi, búgingi deıin bizde Úkimet aıqyndaǵan mamandyqtar tizimi bekitilip kelgen bolatyn. Biz buny kvotadan tys júzege asyrýdy usynamyz. Al álgindeı anyqtamalar ruqsatnamalardyń ornyna júretin bolady. Degenmen, anyqtama negizinen jumysshynyń biliktiligi joǵary ekenin ǵana rastaıtyn bolady. Osyǵan oraı, sheteldik jumysshy Qazaqstannyń kez kelgen óńirinen úsh aıdyń ishinde biliktiligi boıynsha kez kelgen jumysty taýyp, oǵan ornalasa alady», - deıdi T. Dúısenova.
Budan bólek, mınıstr sheteldik jumys kúshin tartý úderisin jetildirý aıasynda jumys berýshige ruqsat berý ıdeologııasy tutastaı qaıta qaralatynyn atap ótti. «Biz neni qaıta qaraýdy josparlap otyrmyz? Usynylatyn tártip boıynsha kvotalar ekonomıkalyq belsendi halyqqa shaǵa otyryp esepke alynbaıdy, kerisinshe salalar boıynsha esepteletin bolady. Máselen, ekonomıkalyq qyzmet túrleri boıynsha osy sala qyzmetkerler sanynyń paıyzdyq qatynasyna qaarı bólinedi», - dedi T. Dúısenova. Onyń aıtýynsha, qazirgi kúni sheteldik jumys kúshin tartýǵa kvota mólsheri ekonomıkalyq belsendi halyq sanyna shaǵylyp anyqtalady. «Alaıda, bul rette qaı salaǵa sheteldik jumys kúshiniń kóbirek kerek ekenin eshkim de aıta almaıdy», - deıdi mınıstr.
