Elimizge shetelden 100 úzdik maman tartylady

ASTANA. QazAqparat – Sheteldikterdiń Qazaqstanda turýyna yqtııarhat berý múmkindigi qarastyrylǵan «Baǵaly daǵdylar vızasy» engiziledi. Bul týraly búgin Úkimet otyrysynda Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

Tamara Dúısenovanyń atap ótýinshe, «Ashyq Qazaqstan 500+» atty kóshi-qon saıasatynyń jańa tujyrymdamasynyń úshinshi baǵyty aıasynda elimizde tapshy bolǵandyqtan, syrttan jıi tartylatyn mamandyqtar boıynsha shetelden 100 úzdik mamandy tartý kózdelip otyr.

«Mundaǵy negizgi maqsat – bilim transferti jáne osy kásipter boıynsha óz mamandarymyzdy daıarlaý. Olardyń Qazaqstanda turýyna yqtııarhat berý múmkindigi qarastyrylǵan «Baǵaly daǵdylar vızasy» engiziledi. Sonymen birge «Qundy daǵdylar reıtıngi» jasalady. Bul reıtıngtegi tapshy kásipter men mamandyqtar tizimi únemi jańartylyp otyrady», - dedi ol.

Mınıstrdiń aıtýynsha, kórshi elderden keletin, sonyń ishinde tirkeýsiz, beıresmı arnalar arqyly kelip jatqan eńbek mıgranttarynyń qozǵalysyn esepke alýdy kúsheıtý kózdelip otyr.

«Eńbek mıgranttaryn tartý jeke tulǵalardyń naqty suranysyna saı aıqyndalady. Sondaı-aq mıgranttardyń jumys ornyna qatań baqylaý ornatylatyn bolady», - dedi Tamara Dúısenova.