Elimizge ońtústikten-soltústikke kóshýdi yntalandyrý tetikteri qajet - T. Dúısenova
ASTANA. QazAqparat - Qazaqstannyń ishki kóshi-qon úderisinde ońtústikten-soltústikke qaraı halyqtyń kóshýine yntalandyrý tetikteri qajet. Búgin Májiliste kóshi-qon úderisterine arnalǵan dóńgelek ústel barysynda Densaýlyq saqtaý jáne áleýmettik damý mınıstri Tamara Dúısenova osylaı málimdedi.
Mınıstrdiń sózine qaraǵanda, álemdik tájirıbede ekonomıkalyq ósim halyqtyń shoǵyrlanýy joǵary aýdandarda oryn alady. Sonymen qatar, daryndy jastar umtylatyn, ǵylym men ınnovatsııa qalyptasatyn jerlerge ınvestıtsııalar aǵyny da kóbirek tartylady. Bul rette mınıstr T. Dúısenova Qazaqstandaǵy jaǵdaıǵa toqtala kele, halyqtyń shoǵyrlanýy joǵary ońtústik óńirlerde ónimdilik eń tómen deńgeıde ekenin, kerisinshe halyq tyǵyzdyǵy tómen batys óńirinde ónimdilik joǵary bolyp otyrǵanyn alǵa tartty. Málimetterge qaraǵanda, elimizdiń negizinen soltústik óńirler kóbinese álemdik tendentsııaǵa sáıkes bolyp otyr.
«Álemdik tájirıbelerge kelsek, ishki kóshi-qonnyń basty trendteri saıası, ekonomıkalyq, ındýstrııalyq negizderden týyndaıdy. Qazaqstanda ishki kóshi qon saıasatyn eki baǵytta jetildirýdi usynamyz, bular: ońtústikten-soltústikke jáne aýyldan-qalaǵa. Bul rette aýyldan qalaǵa qaraı kóshi-qon úderisi elimizde meılinshe tabıǵı qalypta órbip otyr, ıaǵnı buǵan eshqandaı da yntalandyrýdyń qajeti kerek emes. Al ońtústikten-soltústikke kóshi-qon úderisin arttyrý úshin yntalandyrý tetikteri, jurtshylyqty kóshirý úshin jaǵdaılar jasalýy kerek. Bunyń bári erikti túrde júzege asýy shart», - dedi Tamara Dúısenova.
