Elimizge Qytaıdan - 77245, Mońǵolııadan - 107988, Ózbekstannan 457241 adam kóship kelgen

Bul jaıynda www.bnews.kz portalynda ótken Online-konferentsııa barysynda QR Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev málim etti, dep habarlaıdy QazAqparat.

  Ol bul derekti elorda turǵynynyń Qytaıdan, Ózbekstannan, Monǵolııadan nemese basqa da memleketterden qandastarymyzdy tarıhı Otanyna kóshirip alý jumystary qalaı júrgizilýde, degen saýalyna oraı aıtty.

  «Biz ol jaqtan óz kúshimizben kóshirip alý saıasatyn júzege asyryp otyrǵan joqpyz. Sebebi Ózbekstanmen, Qytaımen, Mońǵolııamen de ondaı memleketaralyq kelisim joq. Degenmen, Mońǵolııamen bir ret memleketaralyq kelisim bolǵan edi. Sol kezde, ıaǵnı 1991 jyly 66 myń adamy bar 13 myń otbasy qonys aýdarǵan bolatyn. Al qazirgi kúni biz osy memleketterden óz betinshe kóship kelgen azamattarǵa kvota daıyndap, olardy qarsy alyp, járdememaqy, kómekaqy berip, Qazaqstanǵa ornalasýyna jaǵdaı jasap otyrmyz. Búgingi kúni kvotamyzdyń barlyǵy ashyq jáne elimizge qonys aýdarǵan azamattardyń barlyǵyna da beriledi», dedi Q.Ábishev.

  Komıtet tóraǵasynyń aıtýynsha, joǵaryda keltirilgen derekter elimizdiń kóshi-qon komıtetine tirkelip, oralman mártebesin alǵan azamattardyń naqty sany eken. Degenmen atalǵan komıtetten tysqary, oralman mártebesin almaı-aq tikeleı azamattyqqa qujat tapsyrǵan, óz betinshe kóship kelgen azamattardy jáne bunyń aldynda, ıaǵnı 91 jyldardaǵy, keńes úkimeti bar kezdiń ózinde Mońǵolııadan qonys aýdarǵan qandastarymyzdy eseptesek, bul san birshama kóbeıedi.