Elimizge qaı memleketterden týrıster aǵylýy múmkin

ASTANA. QazAqparat – Qaladaǵy týrızmdi damytý ortalyǵy qaýymdastyǵynyń dırektory Tatıana Vernıtskaıa Qazaqstanǵa qaı elderdiń týrısteri kóptep kelýi múmkin ekenin aıtty, dep habarlaıdy QazAqparatt tilshisi.

«Elimizge Qazaqstannyń soltústik bóligimen shektesetin, ıaǵnı Reseı aýmaǵynan keletin týrıster aǵynyn eskerý kerek. Ekaterınbor, Omby, Túmen, Qorǵan, Novosibir oblystarynda 32 mıllıon reseılik turady. Sondyqtan olardy elimizge keletin týrıst retinde qarastyrýǵa bolady», - dedi T. Vernıtskaıa agenttik tilshisiniń suraǵyna jaýap bere otyryp.

Osy oraıda sarapshy bul baǵytta bizge kimder básekeles bolyp turǵanyn aıtty.

«Biraq olar Astanany Qazan qalasymen salystyratynyn túsinýimiz kerek. Qazan qalasy da adamdardy ózine kóptep tartyp jatyr. Bul shahardaǵy qonaqúılerdiń sany bizdegiden kem emes. Alaıda bizde týrısterge degen kózqaras múldem basqa. Óıtkeni Qazan qalasy ekskýrsııalyq baǵdarlama jaǵynan bizden alda kele jatyr. Kópshilik olardyń tarıhyna qyzyǵyp jatady, biraq bizdiń de baı tarıhymyz, qundylyqtarymyz, muramyz bar. Sondyqtan biz de osy týrısterdi kóptep tarta alamyz», - dedi ol.

T. Vernıtskaıanyń paıymynsha, bul salada Iran jaǵynan da týrısterdi shaqyrýǵa bolady.

«Bul saladaǵy aýqymdy naryq retinde Irandy da eskergen jón. Osy oraıda ushaq reısterin retke keltirý kerek. Qytaılyqtar elimizge týrıst retinde kele bastady, al ırandyqtar tek Aqtaýǵa baryp jatyr. Olardyń qarjysy elimizdiń basqa óńirlerine de jetkenin qalaımyz», - dedi sarapshy.