Elimizge Iran men Reseıden keletin týrıster sany artty

ASTANA. QazAqparat – Ótken jyldyń qorytyndysy boıynsha Qazaqstanda ishki týrıster sany ósip, 8,5 mln adamǵa jetti. Bul týraly Jibek Joly telearnasyna suhbat bergen Mádenıet jáne sport mınıstri Ashat Oralov málim etti, dep habarlaıdy QazAqparat tilshisi.

Vedomstvo basshysynyń aıtýynsha, byltyrǵy ishki týrızmniń ósimi pandemııaǵa deıingi kezeńmen salystyrǵanda 2 mln adamǵa artyq.

«Ulttyq statıstıka bıýrosynyń dereginshe, ótken jyly ishki týrısterdiń sany 8,6 mln adamǵa jetti. Bul nátıjeni jaqsarta túsý úshin Mádenıet jáne sport mınıstrligi 10 negizgi baǵytty anyqtady. Qazaqstannyń ár óńirinde, atap aıtqanda 3 megapolıste jáne 17 oblysta ózimizdiń biregeı, erekshe oryndarymyz bar. Pandemııanyń saldary ishki týrızmniń damýyna yqpal etkenin kórip otyrmyz. Qazaqstandyqtar elimizdiń ózge óńirlerine jıi saıahattaı bastady», - dedi Ashat Oralov.

Mınıstr atap ótkendeı, bul rette reseılik týrıster sany da ulǵaıǵan.

«Bizge árqashan reseılik týrıster jıi kelip turady. Degenmen qazir olardyń sany artyp keledi. Bul ásiresi shekara mańyndaǵy aımaqtarda aıqyn baıqalady. Sondaı-aq, Mańǵystaý oblysyna Irannan keletin týrısterdiń qatary kúrt artty. Memleket basshysynyń Iran Respýblıkasyna jasaǵan saparynyń qorytyndysy boıynsha vızasyz rejımge qol qoıyldy. Bul úlken jańalyq. Osy jyldyń naýryz aıynda, ıaǵnı Naýryz merekesi qarsańynda alǵashqy 300 týrıst Mańǵystaý oblysyna, atap aıtqanda Aqtaý qalasyna keldi», - dep toqtaldy mınıstr.

Qosa ketsek, byltyr elimizde týrızmnen túsetin salyq kólemi 1,5 ese ósken.