Elimizge dintanýshylar óte qajet - Ǵarıfolla Esim
ASTANA. 16 qarasha. QazAqparat /Rýslan Ǵabbasov/ - Elimizge dintanýshylar óte qajet. Bul týraly búgin Qazaqstan dintanýshylarynyń birinshi forýmynda QR Parlamenti Senatynyń depýtaty Ǵarıfolla Esim málim etti.
«Bizge dintanýshylardy daıarlaıtyn arnaıy mamandardy daıarlaý qajet. Atap aıtqanda elimizdegi birqatar oqý oryndarynda bul jumystar júrgizilýde jáne buǵan jańa qarqyn berý kerek. Qazir bizge dintanýshylar óte qajet»,-dedi depýtat.
«Dintaný negizin bilim retinde oqýǵa múmkindik tolyq bar. Endi dintaný páni nege negizdeledi? Osy máseleni túsiný qoǵamda ártúrli kózqarastarǵa, tipten túsinbeýshilikterge bastap bara jatyr. Dintaný ortany ustaıdy, ıaǵnı ol - ateıstik maǵynadaǵy pán emes, sondaı-aq ol dindi nasıhattaıtyn da pán emes. Din jáne dinder týraly obektıvti bilim ári aqparat beretin aǵartýshylyq mazmundaǵy pán»,-dep túsindirdi Ǵ. Esim. Osy oraıda ol dintanýshy ǵalymdar birinshiden saraptama isimen shuǵyldanýy kerek ekenin qadap aıtty.
