Elimizge dári-dármekti basqa joldarmen jetkizý qarastyrylyp jatyr

NUR-SULTAN. QazAqparat - QR Densaýlyq saqtaý mınıstrligi 1,5 myńnan astam dári-dármek túrin satyp aldy. Onyń 600-den astamy shetelde óndirilgen, dep habarlaıdy QazAqparat tilshisi.

«Satyp alynǵan dári-dármektiń 919-y - otandyq. Ony jetkizýde problema joq. Al 628 ataýly dárilik zat pen medıtsınalyq buıymdar shetelde óndirilgen»,-delingen habarlamada.

QR Densaýlyq saqtaý mınıstrligi baspasóz qyzmetiniń habarlaýynsha, 529 ataýly dárilik zat kestege saı jetkizilip jatyr.

Atap aıtqanda, 9 dári-dármek pen medıtsınalyq buıym tolyq kólemde elge ákelindi.

Sonymen qatar, 71 ataýly dári-dármekti jetkizý marshrýttaryn ózgertý josparlanyp jatqany aıtyldy.

«Biryńǵaı dıstrıbıýtordan satyp alýǵa jatatyn preparattardyń tizbesin densaýlyq saqtaý mınıstrligi bekitti. Tizim dárilik zattardyń sıpattamalaryn, halyqaralyq patenttelmegen ataýyn jáne olardyń shekti baǵalaryn qamtıdy. Patsıentterdi qamtamasyz etý úshin preparattardy medıtsınalyq uıymdarǵa jóneltý kestege sáıkes ýaqtyly júzege asyrylady. Dári - dármekter turaqty negizde statsıonarlarǵa, sondaı-aq halyqty ambýlatorııalyq dári-dármekpen qamtamasyz etý úshin medıtsınalyq uıymdarǵa jetkiziledi», - deıdi vedomstvodan.

Odan bólek, mınıstrlik taratqan aqparatta biryńǵaı dıstrıbıýtordyń dári-dármek jetkizý jumysyn jetildirgeni aıtylǵan.

«Dári-dármekti aımaqtarǵa bólý Cross-docking qaǵıdaty boıynsha júzege asyrylady. Dári-dármekterdi tıep-jóneltý medıtsınalyq uıymdardyń ótinimderi boıynsha merziminen buryn júrgiziledi. Budan basqa, biryńǵaı dıstrıbıýtordyń qoımalarynda dári-dármekterge, sondaı-aq medıtsınalyq uıymdardaǵy qaldyqtarǵa turaqty negizde monıtorıng júrgiziledi. Aqparat apta saıyn QR Densaýlyq saqtaý mınıstrligine usynylady», - dep málimdeldi.