Elimizge bilikti kadrlardy tartatyn «Ashyq Qazaqstan 500+» tujyrymdamasy ázirlendi

ASTANA. QazAqparat – Búgin Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova «Ashyq Qazaqstan 500+» atty kóshi-qon saıasatynyń jańa tujyrymdamasyn tanystyrdy, dep habarlaıdy QazAqparat tilshisi.

«Sizderdiń nazarlaryńyzǵa «Ashyq Qazaqstan 500+» atty kóshi-qon saıasatynyń jańa tujyrymdamasyn usynyp otyrmyz. Bul qujat Memleket basshysynyń tapsyrmasyna sáıkes ázirlenip, Ekonomıkalyq reformalar jónindegi joǵary keńeste maquldanǵan», – dedi mınıstr QR kóshi-qon saıasatynyń 2023-2027 jyldarǵa arnalǵan tujyrymdamasyn tanystyra kele.

Tamara Dúısenovanyń atap ótýinshe, tujyrymdama elimizdiń ekonomıkalyq damýyn kadrlyq jaǵynan qamtamasyz etýdi kózdeıdi.

«Onyń aıasynda aldaǵy jumystyń basty 3 blogy aıqyndaldy. Atap aıtqanda – elimizge bilikti kadrlardyń kelýin yntalandyrý, shetelde jumys isteıtin qazaqstandyqtardyń quqyǵyn qorǵaý jáne óńirler arasyndaǵy demografııalyq teńgerimsizdikti joıý. Sondaı-aq, elimizge eń tapshy mamandyqtar boıynsha 500 myqty mamandy tartý úshin 7 baǵytta jumys júrgiziledi», - dedi ol.