Elimizge «Akvaósirý týraly» zań qajet – Ekologııa mınıstri
«Biz qoldanystaǵy zańnamaǵa taldaý jasap, mynadaı basty problemalardy anyqtadyq. Birinshi, sý qorǵaý beldeýinde balyq ósirý sharýashylyqtary men qurylystaryn salýǵa tyıymnyń salynýy. Ekinshi, balyq ósirý kezinde sýdy tutyný úshin artyq tólemniń alynýy. Bul jerde, balyq ósirýshiler alynǵan sýdyń barlyq kólemi úshin tóleıdi, al qaıtarylatyn sýdyń kólemi eskerilmeıdi. Úshinshi, jergilikti mańyzy bar sý aıdyndarynyń kóp bóligi bızneske berilmegen. Tórtinshi, toǵandar men balyq ósirý basseınderiniń qurylysyna jobalyq-smetalyq qujattama ázirleý jáne memlekettik saraptamadan ótý qajettiligi», - deıdi QR Ekologııa, geologııa jáne tabıǵı resýrstar mınıstri.
Maǵzum Myrzaǵalıev Salyq, Sý jáne Jer kodeksterine, sondaı-aq basqa da zańdarǵa ózgerister ázirlep, tıisti zań jobasyna engizgenderin aıtty.
«Túzetýler múddeli memlekettik organdarmen kelisilgen jáne kúzde Parlamentke engiziletin bolady. Sonymen qatar, akvaósirý sátti damyǵan birqatar elde balyqty jasandy ósirý salasyndaǵy qatynastardy retteıtin jeke zań bar ekenin atap ótken jón. Sondyqtan, «Akvaósirý týraly» Zań qajet dep sanaımyz. Qurmetti Asqar Uzaqbaıuly, bizdiń bastamamyzdy qoldaýdy suraımyn«, - dedi ol.
Eske sala ketsek, QR Ekologııa, geologııa jáne tabıǵı resýrstar mınıstri Maǵzum Myrzaǵalıev búgin Úkimet otyrysynda balyq sharýashylyǵyn damytýǵa kedergi 3 problemany atady. Olardyń alǵashqysynyń sheshimi retinde sý qoımalaryn balyq aýlaýdan balyq ósirýge beıimdeýdi usyndy.
