Elimizge 1,5 tsentner irimshikti zańsyz ótkizbek bolǵan qyrǵyz azamaty quryqtaldy
ASTANA. 25 qarasha. QazAqparat - Qazaqstan shekarashylary Reseı Federatsııasyna zańsyz ótkizilmek bolǵan bir tsentnerden astam alkogol ónimderiniń jolyn kesti, dep habarlady QR UQK ShQ baspasóz qyzmetinen.
Osy oqıǵa boıynsha Aqtóbe shekara otrıadyna qarasty «Álimbet» shekaralyq baqylaý otrıadynyń narıady 1955 jyly týǵan elimizdiń azamatyn ustady.
Ustalǵan azamat 125 lıtr araq-sharap ónimderin tıep, «Gaz» avtomobılimen shekarany kesip ótpek boldy.
Osy kúni ońtústiktegi «Aısha bıbi avto» beketiniń shekaralyq baqylaý narıady 1,5 tsentner bolatyn irimshikti elimizge jasyryn alyp ótpek bolǵan 40 jastaǵy qyrǵyz azamatyn ustady. Jasyryn júkti «Gırda» esimdi ıisshil ıt «Folksvagen» avtokóliginiń ishinen tapty.
Atalǵan derekter boıynsha quqyqqorǵaý organdary habarlandyrylyp, tergeý amaldary júrgizilýde.
