Elimizdiń JOO-larynda sýıtsıdologııa salasyndaǵy mamandar daıarlanbaq
«Bas prokýratýranyń derekterine sáıkes, 2020 jyly jasóspirimder arasynda 143 sýıtsıd jaǵdaıy tirkelgen, bul 2019 jylmen salystyrǵanda 36 birlikke (2019 jyly – 179), al sýıtsıd áreketteriniń sany 44 birlikke (2020 jyly – 306, 2019 jyly – 350) azaıǵan. Úkimet tarapynan jasóspirimder arasynda sýıtsıdtiń kóbeıýi máselelerin sheshý maqsatynda 2020-2023 jyldarǵa arnalǵan arnaıy jol kartasy qabyldandy. Qujatta jastar men balalar arasyndaǵy sýıtsıdtik minez-qulyqtyń aldyn alý jáne olarǵa qajetti medıtsınalyq-psıhologııalyq kómek kórsetýge baǵyttalǵan keshendi sharalar qarastyrylǵan», - dedi Úkimet basshysy.
Onyń atap ótýinshe, búginde óńirlerde 1 876 psıhologııalyq qyzmet quryldy. Onda balalardyń quqyqtaryn qorǵaý boıynsha 11 myńnan astam maman, onyń ishinde bilim berý júıesinde 7 myńnan astam pedagog-psıholog jumys isteıdi. Olar kúndelikti ómirde psıhologııalyq qıyndyqtarǵa tap bolǵan balalarǵa jáne olardyń ata-analaryna kómek kórsetedi. Sonymen qatar barlyq óńirlerde «Januıa» otbasy ınstıtýtyn qoldaý ortalyqtary ashyldy. Ortalyqtar olar otbasylarǵa áleýmettik beıimdeý, oqytý jáne taǵy basqa máseleler boıynsha zańgerlik, psıhologııalyq jáne áleýmettik kómek kórsetedi.
«Bilim berý uıymdarynda zorlyq-zombylyqty, qatygezdikpen qaraýdy boldyrmaý, onyń ishinde sýıtsıdtik minez-qulyqtyń aldyn alý jumystaryn kúsheıtý sharalary qabyldanýda. Joǵary oqý oryndarynda sýıtsıdologııa salasyndaǵy mamandardy daıarlaý sharalary qabyldanýda. Jasóspirimderdiń psıhıkalyq densaýlyǵyn qorǵaý máseleleri pedogogıkalyq joǵary oqý oryndarynyń jáne kolledjderdiń bilim berý baǵdarlamalaryna engizildi», - dedi Premer-Mınıstr.
Úkimet basshysynyń aıtýynsha, Respýblıkalyq psıhıkalyq densaýlyq ǵylymı-praktıkalyq ortalyǵy men BUU Balalar qorynyń (ıÝNISEF) birlesken jospary aıasynda 2020 jyly bilim berý uıymdarynyń barlyq pedagog-psıhologtarynyń biliktiligin arttyrý kýrstary uıymdastyryldy.
«Balalarǵa qatysty zorlyq-zombylyq jáne qatygez qaraý problemasyna kópshiliktiń nazaryn aýdarý maqsatynda jyl saıyn «Qatygezdiksiz jáne zorlyq-zombylyqsyz balalyq shaq» respýblıkalyq aqparattyq naýqany (2020 jyly naýqan aıasynda 754,9 myń oqýshyny jáne 276,3 myń ata-anany qamtı otyryp, 7 myńnan astam is-shara ótkizildi) ótkiziledi», - dedi Asqar Mamın.
