Elimizdiń JOO-larynda bilim granttaryn taǵaıyndaý konkýrsyna ótinishter qabyldaý aıaqtaldy

«2015 jyldyń shilde aıynyń 23-i men 31-iaralyǵynda barlyq joǵary oqý oryndarynyń qabyldaý komıssııalarynda bilim granttaryn taǵaıyndaý konkýrsyna ótinishter qabyldandy», dep habarlady Ulttyq testileý ortalyǵynan.

Bilim grantyn taǵaıyndaý konkýrsyna qatysý kezinde qazaq bólimi úshin qazaq tili, Qazaqstan tarıhy, matematıka jáne tańdaý páni; orys bólimi úshin orys tili, Qazaqstan tarıhy, matematıka jáne tańdaý pániniń baldary eskeriledi. Eger talapker UBT sheńberinde tapsyrylǵan 5 pánniń bireýinen nemese TKT pánderiniń bireýinen 4 baldan tómen alsa, onda ol bilim granttaryn taǵaıyndaý konkýrsyna jáne JOO-ǵa aqyly bólimge de jiberilmeıdi.

Konkýrsqa ótinish qabyldaý aıaqtalyp, baza jabylǵannan keıin, 1 tamyzdan bastap Ulttyq testileý ortalyǵy bilim granttaryn taǵaıyndaý boıynsha respýblıkalyq konkýrstyq komıssııanyń otyrysyna qujattar daıyndaıdy.

Bilim granttaryn taǵaıyndaý boıynsha respýblıkalyq konkýrstyq komıssııanyń otyrysy 2015 jyldyń 1-10 tamyzy aralyǵynda ótedi.

Bilim granttaryn taǵaıyndaý boıynsha respýblıkalyq konkýrstyq komıssııa jumysy aıaqtalǵannan keıin bilim granty ıegerleriniń tizimi «Egemen Qazaqstan» jáne «Kazahstanskaıa pravda» respýblıkalyq gazetterinde, sonymen qatar Ulttyq testileý ortalyǵynyń www.testcenter.kz saıtynda jarııalanady. Sonymen qatar osy saıtta konkýrsqa ótinish qabyldaý boıynsha barlyq normatıvtik qujattar júkteldi.