Elimizdiń joldaryndaǵy qar qursaýynan 271 adam men 108 kólik qutqaryldy
ASTANA. QazAqparat - Keshe saǵat túski 15.00-der shamasynda Qaraǵandy oblysynyń Osakarov aýdanyndaǵy «Molodejnyı-Shiderti» tas jolyndaǵy qar qursaýynda ishinde 5 adamy bar jeńil avtokólik qalyp qoıǵan. Oblystyń TJD órt sóndirý qyzmetiniń 3 qyzmetkeri men 1 tehnıkasy jumyldyrylyp, jolaýshylar qardan tazartylǵan jolǵa shyǵarylǵan.
Al Qostanaı oblysynda «Jezqazǵan-Petropavl» tas jolynyń 60-shy shaqyrymynda saǵat 03.20-da qar qursaýynda 11 jeńil jáne 2 júk kóligi qalyp qoıǵan. Olarda barlyǵy 30 adam bolǵan. «Agroınterptıtsa» JShS qyzmetkerleriniń kómegimen jolaýshylar qar qursaýynan shyǵarylyp, Arqalyq qalasyna deıin jetkizildi.
Sondaı-aq «Arqalyq-Torǵaı» tas jolynyń 25-shaqyrymynda saǵat 10.00-de 15 jeńil avtokólik pen 2 avtobýs jáne 13 júk kóligi qarǵa bógelip qalǵan (85 adam). «Qazavtojol» kásipornynyń qyzmetkerleriniń kómegimen jolaýshylar mejelegen mekenderine aman-esen baǵyttaldy.
Al «Qostanaı-Qarabutaq» tas jolynyń 230-shaqyrymynda túski saǵat bir jarymdar kezinde ishinde barlyǵy 57 adam bolǵan 34 jeńil avtokólik qar qursaýynda qalyp qoıǵan. «Qostanaı joldary» JShS qyzmetkerleriniń kúshimen kólikter qardan tazartylǵan jolǵa shyǵaryldy. Ótken táýlik ishinde jalpy qar qursaýynan 271 adam men 108 tehnıka shyǵaryldy, dep habarlaıdy QR TJM baspasóz qyzmetinen.
