Elimizdiń joǵary saıası basqarý júıesi tolyqtaı jańartylady - saıasattanýshy
Onyń aıtýynsha, Joldaýdaǵy eń basty saıası jańalyq, bul – Memleket basshysynyń elimizdiń saıası júıesiniń turaqtylyǵyn saqtaýmen qatar, jańa geosaıası táýekelder men ishki saıası suranystarǵa jedel ári tıimdi jaýap berý maqsatynda osy jyldyń kúzinde Prezıdent saılaýyn ótkizý týraly joǵary deńgeıdegi saıası sheshim qabyldaýy.
-Qazirgi álemde saıası ózgerister kóz ilespes shapshańdyqpen ótip jatyr. Syrtqy álemde nemese el ishinde bolǵan kez-kelgen saıası ózgerister olarǵa jedel ári tıimdi jaýap berýdi talap etedi. Olaı bolmaǵan jaǵdaıda, bul ishki saıası turaqtylyq pen eldiń áleýmettik-ekonomıkalyq damýyna zııan tıgizýi múmkin. Sondyqtan, Prezıdenttiń ózi atap ótkendeı, kelesi jyldyń ortasyna deıin elimizdiń joǵary saıası basqarý júıesi tolyqtaı jańartylýy tıis, - deıdi saıasattanýshy.
Onyń paıymdaýynsha, sol sebepti osy jyly kúzde Prezıdent saılaýy ótetin bolsa, kelesi jyldyń kókteminde Parlament Májilisi men barlyq deńgeılerdegi máslıhattar saılaýy kezek kútedi. Sodan keıin ǵana jańa Úkimet quramy jasaqtalady. Árıne, Prezıdent saılaýy ótken soń, Úkimet óz ókilettigin toqtatady. Sondyqtan Úkimettiń jańa quramy nelikten Parlament Májilisi saılaýynan keıin jasaqtalatyndyǵyna da Prezıdent óz Joldaýynda naqty jaýap berip ótti.
«Bolashaqta Úkimet quramynda Parlament Májilisi saılaýynda jeńiske jetken barlyq saıası partııalar ókilderiniń de bolýy kózdelýde. Álemniń barlyq damyǵan demokratııalyq elderinde Úkimet quramy osylaı jasaqtalady. Qoryta aıtqanda, Prezıdent Joldaýy demokratııalyq ári ádiletti «Jańa Qazaqstannyń» aýqymdy saıası jospary jáne elimizdegi saıası reformalardyń jańa demokratııalyq lıberaldy kezeńine jol ashqan saıası qujat boldy», dep túıindedi oıyn Turar Tólegenuly.
