Elimizdiń joǵary oqý oryndary elektrondyq tehnologııalarmen jabdyqtalyp, jańashyldyqqa beıimdelýde - J. Ádilov
ALMATY. Jeltoqsannyń 20-sy. QazAqparat /Ádilet Musahaev/ - Búgin Almatyda QazUTÝ-dyń bazasynda Joǵary oqý oryndary arasynda respýblıkalyq elektrondyq kitaphananyń jáne ýnıversıtet portalynyń tanystyrylymy boldy,
dep habarlaıdy QazAqparat.
Atalmysh ýnıversıtettiń rektory Jeksenbek Ádilovtyń aıtýynsha, Respýblıkalyq elektrondyq kitaphananyń negizgi mindeti respýblıkadaǵy barlyq joǵary oqý oryndarynyń elektrondyq kitaphanalaryn biriktirý bolyp tabylady.
«Elimizdiń joǵary oqý oryndary elektrondyq tehnologııalarmen jabdyqtalyp, jańashyldyqqa beıimdelýde. Desek te, oqý ordalarynda elektrondyq oqytý resýrstarynyń jetispeýshiligi, ásirese ana tilimizdegi elektrondyq oqýlyqtardyń tapshylyǵy, bilim berý salasyndaǵy sheshimin tappaı otyrǵan negizgi máselelelerdiń biri. Osyndaı boı kótergen keleńsizdikterge baılanysty, QR Bilim jáne ǵylym mınıstri Janseıit Túımebaev Respýblıkalyq elektrondyq kitaphana ashý týraly buıryq shyǵarǵan bolatyn. Elektrondyq kitaphanany ashýdaǵy basty maqsat - professorlyq-oqytýshylyq quramdy, stýdentterdi, magıstranttar men doktoranttardy ınteraktıvti mýltımedııalyq bilim berý resýrstarymen qamtamasyz etý. Búginde atalmysh kitaphananyń bazasyn tolyqtyrý úshin joǵary oqý oryndarynyń qolda bar elektrondyq-aqparattyq bilim berý resýrstaryn jınaý, toptastyrý jumystarymen QR Joǵary oqý oryndarynyń qaýymdastyǵy, al tehnıkalyq jaǵynan qamtamasyz etýmen «KazRENA» Qazaqstannyń ǵylymı bilim berý kompıýterlik jelisiniń qaýymdastyǵy aınalysýda», deıdi rektor.
