Elimizdiń joǵary áskerı oqý oryndary kýrsanttar qabyldaıdy
Qorǵanys mınıstrligi baspasóz qyzmetiniń málimetinshe, búginde elimizdiń áskerı bilim berý júıesine Almatydaǵy armııa generaly Saǵadat Nurmaǵambetov atyndaǵy Qurlyq áskerleriniń áskerı ınstıtýty men Radıoelektronıka jáne baılanys áskerı-ınjenerlik ınstıtýty jáne Aqtóbedegi Keńes odaǵynyń eki márte Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýty kiredi.
Joǵary oqý oryndaryna túsý merzimi zańmen belgilengen. Oǵan sáıkes, 2022 jyldyń birinshi sáýirine deıin aýdandyq jáne qalalyq qorǵanys isteri jónindegi basqarmalar azamattardyń ótinishterin qabyldaýdy júzege asyrady. Birinshi mamyrda aıaqtalǵan úmitkerlerdi aldyn ala irikteý rásiminen keıin shaqyrý komıssııalary joǵary oqý ornyna túsetin talapkerlerdi anyqtaıdy.
Jergilikti áskerı basqarý organdarynda aldyn ala irikteýden ótken azamattar qujattaryn tapsyrý úshin 15-20 shilde aralyǵynda oqý ornyna kelýi qajet.
Áskerı ınstıtýtqa qabyldaý tórt kezeńnen turady. Alǵashqy kezeńde kásibı-psıhologııalyq irikteý júzege asyrylady. Kelesi kezeńde áskerı-dárigerlik saraptama júrgizý qaǵıdalaryna sáıkes, túpkilikti medıtsınalyq kýálandyrý júrgiziledi. Úshinshi kezeńde dene shynyqtyrý deńgeıi tekseriledi. Sońynan, 5 tamyzda konkýrstyq irikteý jáne joǵary oqý orny kýrsanttarynyń quramyna qabyldaý júrgiziledi.
Qabyldaý komıssııasynyń sheshimi 6 tamyzda jarııalanyp, áskerı ınstıtýttyń ınternet-resýrsyna ornalastyrylady. Apellıatsııaǵa ótinishter kelesi kúni qabyldanady. 8 tamyz kúni áskerı oqý orny bastyǵynyń buıryǵymen qabyldaý komıssııasynyń sońǵy sheshimi bekitiledi.
Bıyl Qazaqstan armııasynyń áskerı qyzmetshilerin sheteldik áskerı oqý oryndarynda oqytýǵa irikteý qaǵıdalaryna ózgerister engizildi. Endi jańa redaktsııaǵa sáıkes, shet memleketterdiń joǵary oqý oryndaryna túsý úshin irikteý QR Qorǵanys mınıstrligi áskerı oqý oryndarynyń birinshi kýrsyna qabyldanǵan áskerı qyzmetshiler qatarynan júzege asyrylatyn bolady.
Kýrsanttar oqý kezeńinde zattaı múlikpen, tamaqpen, kazarmada turýmen jáne aqshalaı úlespen qamtamasyz etiledi.
Foto: gov.kz
