Elimizdiń jınaqtaýshy zeınetaqy qorlaryndaǵy aktıv 3 trln. teńgeni quraıdy
ASTANA. 12 naýryz. QazAqparat - Qazirgi tańda elimizde zeınetaqy aktıvi 3 trln. teńgeden asatyn 10 jınaqtaýshy zeınetaqy qorlary qyzmet etedi. Búgin QR Parlamenti Májilisinde «Qazaqstan Respýblıkasyndaǵy zeınetaqymen qamsyzdandyrý týraly» jańa redaktsııadaǵy zań jobasyn tanystyrǵan Eńbek jáne halyqty áleýmettik qorǵaý mınıstri Serik Ábdenov osylaı málim etti.
Mınıstrdiń aıtýynsha, jınaqtaýshy zeınetaqy qorlaryndaǵy aktıv bir qaraǵanda qomaqty somany bildiredi. «Alaıda, 15 jyldyq jınaqtaýshy zeınetaqynyń úlesi jıyntyq tólemder boıynsha 3-4 paıyzdan aspaıdy. Bul bir jaǵynan elimizdegi jınaqtaýshy júıeniń «jastyǵyn» bildirse, ekinshi jaǵynan zeınetaqy aktıvteriniń ınvestıtsııalyq tabystylyǵy tómen ekendigin kórsetedi», deıdi S. Ábdenov. Onyń aıtýynsha, zeınetaqy júıesiniń kemshiligi ol júıeniń jetilmegendiginen ǵana emes, kóbinese eldegi makroekonomıkalyq jaǵdaıǵa qatysty bolyp tabylady. Bular - ınflıatsııa, shekteýli ınvestıtsııalyq quraldar, qor naryǵynyń damymaǵany, halyqtyń basym bóliginiń zeınetaqy salymyn jetkilikti túrde júzege asyrýǵa múmkindik bermeıtin jalaqynyń tómen deńgeıi.
«Toqtala ketetin jaıt, Jınaqtaýshy zeınetaqy júıeleri ınvestıtsııalaýdyń múmkindigin tolyq paıdalanbaǵan, negizinen qarajat memlekettik qundy qaǵazdarǵa salynǵan. Soǵan oraı, Dúnıejúzilik bank te Jınaqtaýshy zeınetaqy qorlarynyń qyzmetin tıimsiz retinde baǵalaıdy. Budan bólek, Bas prokýratýra osy júıedegi birqatar qarjylyq aıla-sharǵyny áshkerelegen bolatyn. Bunyń barlyǵy qordalanǵan problemalardy salany túbirimen qaıta qurylymdaý jolymen eńserý qajettigin kórsetedi. Osyǵan oraı, Úkimet pen Ulttyq bank zeınetaqymen qamtamasyz etý júıesin jańǵyrtýdy usynady», - deıdi mınıstr S. Ábdenov. Onyń aıtýynsha, problemalardy ońtaıly sheshýdiń qajettigin halyqaralyq ınstıtýttar da maquldap, bul jóninde birqatar usynystar jasaǵan.
