Elimizdiń JІÓ-si 1,5 eseden astam ósti
ASTANA. KAZINFORM — Ulttyq ekonomıka mınıstrligi 2025 jyldyń qorytyndysy boıynsha ekonomıkalyq ósimdi jarııalady.
Mınıstrliktiń málimetine júginsek, 2025 jyldyń qorytyndysy boıynsha jan basyna shaqqandaǵy JІÓ 15 myń AQSh dollaryna jetip, 2018 jylmen salystyrǵanda 52,9%-ǵa artty (2018 jyly 9,8 myń AQSh dollary bolǵan).
— Jan basyna shaqqandaǵy JІÓ ósimine el ekonomıkasynyń turaqty damýy yqpal etti. Ekonomıkanyń nomınaldy kólemi 2018 jylǵy 61,8 trln teńgeden 2025 jyly 159,6 trln teńgege deıin ulǵaıdy. Byltyr ekonomıkanyń kólemi 306 mlrd AQSh dollaryna jetip, 2018 jylǵy deńgeıden 70,6%-ǵa joǵary boldy, — delingen habarlamada.
Tolyǵyraq aıtqanda, 2019-2025 jyldar aralyǵynda JІÓ ósimine ekonomıkany jáne ınvestıtsııalardy ártaraptandyrý, negizgi salalardy (ónerkásip, aýyl sharýashylyǵy, qurylys, kólik jáne qoıma, saýda) ınvestıtsııalaý jáne damytý, básekege qabilettilikti arttyrý, ınvestıtsııalar tartý jáne áleýmettik-ekonomıkalyq reformalardy ilgeriletý áser etti.
Naqty sektor dástúrli túrde ekonomıkalyq ósimniń negizgi draıverine aınaldy. Atalǵan kezeńde taýarlar óndirisi 38,8%-ǵa ósti. Qurylys kólemi 2,4 ese, óńdeý ónerkásibindegi óndiris 41,8%-ǵa, aýyl sharýashylyǵy 25,6%-ǵa, taý-ken ónerkásibi 14,9%-ǵa artty.
— Infraqurylymdyq jobalardy iske asyrý jáne ekonomıkanyń naqty sektoryndaǵy oń serpin qyzmet kórsetý salasynyń 22,1%-ǵa ósýine yqpalyn tıgizdi. Saýdadaǵy ósim 44,1%, kólik qyzmetterinde 38,4%, baılanys salasynda 56,4% boldy. Al negizgi kapıtalǵa salynǵan ınvestıtsııalar kólemi 65,9%-ǵa ulǵaıyp, 23,5 trln teńgege jetti, — dep málimdedi Ulttyq ekonomıka mınıstrligi.
Sondaı-aq, 7 jyl ishinde 55,7 mlrd AQSh dollary kóleminde tikeleı sheteldik ınvestıtsııa tartyldy. Al óńdeý ónerkásibi kásiporyndaryn qoldaý jáne basym eksporttyq naryqtarǵa shyǵý múmkindikterin keńeıtý boıynsha júrgizilgen belsendi jumys oń nátıje kórsetti. Atap aıtqanda, shıkizattyq emes eksport kólemin 1,8 ese arttyryp, 15,8 mlrd AQSh dollarynan 28,8 mlrd AQSh dollaryna deıin jetkizýge múmkindik berdi.
Odan bólek, munaı óndirý kólemi 9,2 mln tonnaǵa ulǵaıyp, 2025 jyldyń qorytyndysy boıynsha 99,6 mln tonna boldy.
Ekonomıkadaǵy eńbek ónimdiligi 21,7%-ǵa ósti. Onyń ishinde qurylys salasynda — 2,3 ese, aýyl sharýashylyǵynda — 66,3%-ǵa, óńdeý ónerkásibinde — 32%-ǵa, saýdada — 28,9%-ǵa ilgeriledi.
Aıta keteıik, buǵan deıin Elimizde 2026 jylǵy qańtar-maýsym aılarynda JІÓ 4,1% óskenin jazǵanbyz.
