Elimizdiń zańdary kásiptik-bilim berýdi jetildirýge yqpal ete almaı otyr - dóńgelek ústel otyrysy
ASTANA. Qarashanyń 11-i. QazAqparat /Aıdar Ospanalıev/ - Qazaqstanda kásiptik-tehnıkalyq bilim berý isi úlken qıyndyqtardy bastan keshirip otyr. Sońǵy jyldary bul salada kóptegen kúrdeli problemalar qalyptasty. Bul týraly búgin Astanada «Innovatsııalyq ekonomıkaǵa arnalǵan qazirgi zamanǵy tehnıkalyq jáne kásibı bilim berý» atty taqyrypta ótken dóńgelek ústel otyrysynda Májilis depýtaty Dınar Núketaeva málim etti,
dep habarlaıdy QazAqparat.
Depýtattyń sózine qaraǵanda, jaǵdaıdyń bulaısha qalyptasýy - kásiptik-tehnıkalyq bilim berýdi damytýǵa baǵyttalǵan normatıvti-quqyqtyq bazanyń jetilmeýinen. «Qazaqstan Respýblıkasyndaǵy bilim berý týraly» zańy men ózge de normatıvti quqyqtyq aktiler jumysshy kadrlardy daıyndaý men qaıta daıyndaý jumystaryn tolyq kólemde qamtamasyz ete alǵan joq. Sondaı-aq tehnıkalyq kásiptik bilim berýdi uıymdastyrý isinde jumys berýshilerdiń jaýapkershiligi tolyq qamtylmaǵan. Bul iske jeke sektordy tartý máselesi de zańda kórsetilmegen. Sońǵy ýaqytta kásiptik-tehnıkalyq mamandyq ıeleriniń mártebesi kóńil toltyrarlyqtaı emes. Sonyń saldarynan ol búgingi ekonomıka talaptaryna jaýap bere alatyndaı deńgeıde damymaı otyr», dedi halyq qalaýlysy.
Onyń pikirinshe, jaǵdaıdyń bulaısha qalyptasýynyń ózindik sebebi de bar. Kásiptik-tehnıkalyq bilim alǵan jastar bizdiń elde óz mamandyqtary boıynsha jumys taba almaıdy.
