Elimizdiń úzdik stýdentteri QR Tuńǵysh Prezıdenti - Elbasy qorynyń stıpendııasyna ıe boldy
ALMATY. QazAqparat - Búgin Almatyda QR Tuńǵysh Prezıdenti - Elbasy qorynyń stıpendıattaryn saltanatty jaǵdaıda marapattaý rásimi ótti.
Bul shákirtaqy 2011 jyly oqý ozaty bolyp júrgen stýdentterdi kótermeleý jáne daryndy jastardy anyqtaý maqsatynda qurylǵan bolatyn. Shákirtaqy alýshylardyń arasynda Qazaqstan boıynsha jetekshi joǵary oqý oryndary usynǵan - joǵary akademııalyq kórsetkishterge qol jetkizgen, óz oqý oryndarynda qoǵamdyq jumystarǵa belsene aralasatyn jáne maqtaý qaǵazdary men sertıfıkattarǵa ıe stýdentter bar.
Bıyl baıqaýdyń irikteý komıtetine 300-den astam ótinim kelip túti. Al Qor jyl saıyn tek 80 shákirtaqy bóledi.
«Elbasy Nursultan Nazarbaev bilim alýdyń zor qundylyq ekendigin qashanda aıtyp júredi. Óıtkeni, bilimdi jastar damýdyń, alǵa jyljýdyń qozǵaýshy kúshi. Qazaqstandy básekege qabiletti eń damyǵan elderdiń qataryna qosý - 21-shi ǵasyrdyń jastary - Sizderge júkteledi! Qordyń basty mindetteriniń biri - mádenıet jáne óner qaıratkerlerine, jas mamandarǵa jáne stýdentterge qoldaý kórsetý. Bıyl biz bul sharany besinshi ret ótkizip jatyrmyz. Іrikteý barysynda qatysýshylardyń barlyǵy da bilimderiniń joǵary deńgeıde ekendigin jáne qoǵamdyq jumystarǵa belsene aralasatyndyǵyn pash etti», - dedi Qordyń atqarýshy dırektorynyń orynbasary Sergeı Toqtarov
Aıta ketelik, Qazaqstan Respýblıkasy Elbasynyń qory Qazaqstan Respýblıkasynyń Prezıdenti bekitken, áleýmettik, qaıyrymdylyq, mádenı, bilim berý jáne basqa da qoǵamdyq-saıası maqsattar boıynsha qurylǵan kommertsııalyq emes uıym.
