Elimizdiń ustazdary dástúrli 6-shy Microsoft Jazǵy mektep sharasyna qatysýda
ALMATY. Tamyzdyń 6-sy. QazAqparat /Ádilet Musahaev/ - Tamyzdyń 2-8-i aralyǵynda Almatyda elimizdiń ınnovatsııalyq ustazdaryna aranalǵan dástúrli 6-shy Microsoft Jazǵy mektep óz jumysyn jalǵastyrýda,
dep habarlaıdy QazAqparat.
Atalmysh sharany Biliktilikti arttyrý ınstıtýty jáne Almaty qalalyq bilim júıesine kadrlardy daıyndaý bólimi QR Bilim jáne ǵylym mınıstrligimen birlesip Microsoft Kazakhstan kompanııasynyń qoldaýymen dúnıejúzilik «Bilimdegi seriktestik» bastamasy aıasynda ótkizip otyr.
«Microsoft Jazǵy mektep osymen 6-shy ret ótkizilip, pedagog qaýymynyń arasynda dástúrli sharaǵa aınalyp otyr. Qazaqstandyq ustazdardyń ózderiniń biliktilikterin arttyrýǵa degen qushtarlyǵy, jańa bilim alyp, zamanaýı aqparattyq-kommýnıkatsııalyq tehnologııalardyń múmkindikterin paıdalanýy qýantarlyq jaǵdaı. Osyndaı sharalardy ótkize otyryp elde sapaly bilim júıesin qalyptastyrýda óz úlesimizdi qosatynymyzǵa kámil senemin», deıdi «Maıkrosoft Qazaqstannyń» Bas dırektory.
Mektep jumysyna bilim berý úderisinde aqparattyq-kommýnıkatsııalyq tehnologııalardy paıdalanatyn qazaqstandyq mektepter men kolledj ustazdary qatysýda. Elimizdiń barlyq aımaǵynan jınalǵan 40 ustaz 5 kúndik bilim baǵdarlamasynan ótip, Microsoft kompanııasynan sertıfıkat alady. Oqytý qazaq, orys tilderinde ótýde.
«Bul shara - oqytýshylyq daǵdylardy jetildirýdegi mańyzdy qadam. Mektep sheńberinde bizdiń muǵalimder IT-ónimderiniń sońǵy múmkindikterimen ǵana tanysyp qoımaı, túrli shyǵarmashylyq jobalar men konkýrstarǵa qatysyp ony óz tájirıbelerinde paıdalana alady», deıdi Almaty qalalyq bilim júıesine kadrlardy daıyndaý bóliminiń dırektory Svetlana Ismaǵulova.
