Elimizdiń úshinshi megapolısinde «Shymkent - qaıyrymdy qala» sharasy ótti

ShYMKENT. QazAqparat – Elimizdiń úshinshi megapolısinde «Shyraıly Shymkent: Bereke basy birlik» qoǵamdyq forýmy aıasynda «Shymkent - qaıyrymdy qala» is-sharasy ótti. Táýelsizdik merekesine oraılastyrylǵan taǵylymdy jıynda ulyq merekeniń qadiri nasıhattalyp, qaıyrymdy qala turǵyndarynyń mártebesi jaıynda oralymdy oılar aıtyldy, dep habarlaıdy QazAqparat tilshisi.

Jıynda saıasattanýshy Sáken Májinbekov pen jazýshy-jýrnalıst Kúlııa Aıdarbekova, «Janýbıı Qozoǵıston» gazetiniń bas redaktory Álisher Satybaldıev Táýelsizdiktiń qadiri jaıynda mazmundy baıandama jasady. Megapolıske aınalǵan qalanyń turǵyndary qandaı bolýy kerek ekeni jóninde oı qozǵady. Sondaı-aq, basqosýda Shymkent qalasy Іshki saıasat jáne din isteri basqarmasynyń tapsyrysy boıynsha jáne «Serpilis» qoǵamdyq qorynyń uıymdastyrýymen ótken jyr baıqaýynyń jeńimpazdary anyqtaldy. Baıqaýǵa 40-qa jýyq ótinim túsip, onyń 12-si irikteýden ótken edi. Ádilqazylardyń sheshimimen birinshi oryndy Arqalyq Ámálııat jeńip alsa, Dáýren Aımanbet - ekinshi, Araılym Muratalıeva úshinshi orynǵa ıe boldy.

Іs-shara aıasynda jyr músháırasyna arnalyp shyǵarylǵan kitaptyń tusaýy kesildi. Shymkent qalasy ishki saıasat jáne din isteri basqarmasynyń basshysy Janar Bektaeva qalanyń damýyna úles qosqan birqatar azamattardy alǵys hattarmen marapattady.