Elimizdiń úshinshi megapolısinde 35 myńǵa jýyq azamat áleýmettik qoldaý sharalarymen qamtylǵan

ShYMKENT. QazAqparat – Shymkentte áleýmettik salada nátıjeli jumyspen qamtýdy jáne jappaı kásipkerlikti damytý» baǵdarlamasy iske asyrylýda. Esepti kezeńde 35 myńǵa jýyq azamat áleýmettik qoldaý sharalarymen qamtylǵan, dep habarlaıdy QazAqparat tilshisi.

Qala ákimi Erlan Aıtahanovtyń aıtýynsha, tehnıkalyq jáne qysqa merzimdi oqytýǵa 5 201, jastar praktıkasyna 3 492, áleýmettik jumys oryndaryna 484, aqyly qoǵamdyq jumystarǵa 2 252 azamat joldanǵan.

«53 azamatqa shaǵyn nesıeler jáne 1 257 azamatqa memlekettik granttar berildi. 14 935 adam turaqty jumys oryndaryna joldanǵan. Aǵymdaǵy jyldyń 1-inshi sáýirinen bastap Elbasynyń tapsyrmasy boıynsha ataýly áleýmettik kómek mólsheri ózgergen. Osynyń esebinen qalada kómek alýshar sany 4,5 esege ósken. Búgingi kúnge 50 794 otbasyna, ıaǵnı 253,9 myń adamǵa 16,8 mlrd teńge qarjy tólendi», -dedi Erlan Aıtahanov.

Shahar basshysynyń sózinshe, aǵa býyn ókilderiniń ýaqytyn tıimdi ótkizý úshin «Belsendi uzaq ómir súrý» ortalyǵy ashylǵan.

«Ol jerde, zeınetkerlerge sportpen shuǵyldaný, kitaphana, kınozal, emdeý bólmeleri qyzmet kórsetedi. Kelesi jyly ortalyqtyń fılıaldary qalanyń basqada aýmaqtarynan ashylady. Odan bólek, qaıyrymdylyq qory «Bolat Ótemuratov» jáne qala ákimdigi birlesip qalamyzda «Asyl Mıras» balalar aýtızm ortalyǵy ashyldy. Ortalyqtyń qyzmeti tegin jáne qoldanylatyn ádisteme sheteldiń ozyq tehnologııalaryna negizdelgen»,- dedi Erlan Aıtahanov.