Elimizdiń úsh óńirinde sý tasqyny qaýpi seıilmeı tur- TJK
NUR-SULTAN. QazAqparat - Elimizdiń úsh óńirinde sý tasqyny qaýpi seıilmeı tur. Bul týraly búgin QR ІІM Tótenshe jaǵdaılar komıtetiniń tóraǵasy Vladımır Bekker málim aıtty, dep habarlaıdy QazAqparat tilshisi.
«Aqmola oblysy boıynsha Tselınograd, Astrahan, Atbasar, Sandyqtaý jáne Arshaly aýdandaryndaǵy sý tasý qaýpin baqylaýda ustap otyrmyz. Atbasar qalasynda Jabaı ózeni ústindegi kópirde tańerteńgi saǵat 8-de sý deńgeıi táýlik ishinde 90 sm-ge kóterildi jáne kópir belgisine deıin 3,5 metrdi quraıdy. Qaýipti deńgeıge deıin áli 1 metr bar. Bul qar erý protsesiniń jalǵasyp jatqandyǵyn bildiredi. Atbasar qalasyna 15 tehnıka jáne 5 júzý quralymen jabdyqtalǵan 50 mamannan quralǵan arnaıy top jiberildi», - dedi V.Bekker.
Sonymen qatar, komıtet basshysy Nur-Sultan qalasyn aýyz sýmen qamtamasyz etip otyrǵan Vıacheslav sý qoımasynda 93 paıyz sý jınalǵanyn jáne qazirgi ýaqytta sýdy sekýndyna 300 tekshe metrden astam kólemde Esil ózenine tranzıttik rejımde aǵyzý júrgizilip jatqanyn aıtty.
«Jalpy respýblıka boıynsha ahýal turaqy ári kúrdeli. Qar erý protsesi júrip jatyr. Kún saıyn qar kólemi de azaıa túsýde. Degenmen, sý tasqyny oryn alýy múmkin óńirler de bar jáne olardy baqylap otyrmyz. Atap aıtqanda, Soltústik Qazaqstan oblysynda Aqqaıyń, Qyzyljar jáne Maǵjan Jumabaev aýdandarynda, Batys Qazaqstan oblysynda Tasqala, Báıterek aýdandary men Oral qalasynda, Shyǵys Qazaqstan oblysynda Qatonqaraǵaı, Altaı, Shemonaıha, Glýbokoe, Besqaraǵaı aýdandarynda sý tasý qaýpi joǵary», - dedi ol.
V.Bekkerdiń atap ótýinshe, osy aptada sý tasý qaýipi óte joǵary bolmaq. Sebebi aldaǵy ýaqytta joǵaryda atalǵan óńirlerdiń barlyǵynda jaýyn-shashyn bolatyndyǵy kútiledi.
