Elimizdiń úsh oblys aýmaǵyndaǵy respýblıkalyq joldarda kólik qozǵalysy jandandy
ASTANA. 16 qańtar. QazAqparat - Úsh oblys aýmaǵyndaǵy respýblıkalyq joldarda kólik qozǵalysy jandandy. Osy joldarda boranǵa baılanysty kólik qozǵalysy shektelgen bolatyn. Bul týraly búgin «Qazaqavtojol» RMK baspasóz qyzmetinen habarlandy.
Atap aıtqanda, Qostanaı oblysy aýmaǵyndaǵy boranǵa baılanysty kesheden beri «Jezqazǵan-Petropavl» jolynyń 255-377 shaqyrymyndaǵy Qaraǵandy oblysy shekarasy men Aqmola oblysy aralyǵynda jabyq turǵan edi. Saǵat 15:00-den bastap bul jolda kólik qozǵalysy qalypty tártipti júzege asyrylýda.
Sonymen qatar Jambyl oblysynda búgin saǵat 11:30-dan beri «Almaty-Tashkent-Termez» jolynyń 536-593 shaqyrymyndaǵy Aısha bıbi aýyly men OQO shekarasy aralyǵynda jol jabyldy. Saǵat 15:50-de bul jol ashyldy.
Budan bólek búgin túste OQO aýmaǵyndaǵy «Almaty-Tashkent-Termez» jolynyń 593-611 shaqyrymyndaǵy Jambyl oblysy shekarasy men Aqbıik aýyly aralyǵynda jol jabyldy. Saǵat 16:00-den bastap bul joldaǵy kólik qozǵalysy jandandy.
