Elimizdiń úsh qalasynyń turǵyndary aqshalaı tabysy boıynsha kósh bastap tur
ASTANA. QazAqparat - Ataýly aqshalaı tabystarynyń kólemi boıynsha Atyraý oblysy, Almaty jáne Astana qalalary aldyńǵy qatarda. Bul týraly búgin Ortalyq kommýnıkatsııalar qyzmetindegi brıfıngte QR Ulttyq ekonomıka mınıstrligi Statıstıka komıtetiniń málimetinde habarlandy.
«2014 jylǵy qarashadaǵy halyqtyń orta eseppen jan basyna shaqqandaǵy ataýly aqshalaı tabystary aldyn ala berilgen derekter boıynsha 62 355 teńgeni qurap, 2013 jylǵy tıisti kezeńmen salystyrǵanda 9,1 paıyzǵa artty. Naqty aqshalaı tabystar 1,4 paıyzǵa ósti», - dedi komıtet basshysy.
2014 jylǵy qarashada halyqtyń orta eseppen jan basyna shaqqandaǵy ataýly aqshalaı tabystarynyń kólemi boıynsha Atyraý oblysy, Almaty jáne Astana qalalary aldyńǵy qatarda. Bul qalalarda osy kórsetkish ortasha respýblıkalyq deńgeıden 2,1-1,8 esege artyq.
2014 jylǵy qarashada tabystary eń tómen óńirler qatarynda Ońtústik Qazaqstan, Jambyl jáne Almaty oblystary belgilendi, osy óńirlerde halyqtyń tabys mólsheri respýblıkalyq deńgeıden 20-39 paıyzǵa tómen. Sonymen birge, halyqtyń naqty aqshalaı tabystarynyń eń kóp ósý qarqyny Mańǵystaý oblysy men Astana qalasynda belgilendi.
2014 jylǵy qarashada óńirler boıynsha ataýly aqshalaı tabystardyń eń joǵary jáne eń tómen mólsherleri arasyndaǵy araqatynas 3,4 eseni qurady (2013 jylǵy qarashada - 3,5 ese).
