Elimizdiń úsh qalasynda erekshe balalarǵa arnalǵan ortalyqtar ashyldy

ASTANA. QazAqparat - «Samuryq-Qazyna» qoldaýymen elimizdiń úsh qalasynda erekshe balalarǵa arnalǵan ortalyqtar ashyldy, dep habarlaıdy QazAqparat atalǵan kompanııanyń baspasóz qyzmetine silteme jasap.

Búgin Balalardy qorǵaý kúnine oraı, Atyraý, Taldyqorǵan jáne Óskemen qalalarynda erte aralasý ortalyqtary ashyldy. Olarda damýynda aqaýy bar 3 jasqa deıingi balalarǵa dıagnoz qoıylyp, emdeý-ońaltý sharalary jasalady. Sonymen qatar, Taldyqorǵan men Óskemende aýtızmi jáne basqa da aqyl-oı kemistigi bar 18 jasqa deıingi balalarǵa arnalǵan Ońaltý ortalyqtary jumys jasaýda.
Óskemendegi ortalyqtyń ashylý rásimine «Samuryq-Qazyna» Qorynyń Basqarma tóraǵasy Nurlan Jaqypov pen Shyǵys Qazaqstan oblysynyń ákimi Danıal Ahmetov qatysty. Qor basshysy óńirde «Samuryq-Qazyna» qoldaýymen ashylǵan eki ońaltý ortalyǵy jumys istep jatqanyn eske saldy.
«Biz qaı óńirde jumys istesek, sol aımaqqa qol ushyn sozamyz! Bul ustanymnan eshqashan aınymaımyz», – dep jazdy Nurlan Jaqypov Twitter-degi paraqshasynda.