Elimizdiń úsh qalasynda dıabet ortalyqtary ashylady

ASTANA. QazAqparat – Elimizdiń úsh qalasynda dıabet ortalyqtary ashylady. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Qant dıabetimen aýyratyn patsıentter medıtsınalyq qyzmetterdi tegin medıtsınalyq kómektiń kepildik berilgen kólemi sheńberinde alady. Taldyqorǵan, Óskemen, Oral jáne Almaty qalalarynda statsıonarlyq jaǵdaıda qant dıabetimen aýyratyn naýqastarǵa mamandandyrylǵan medıtsınalyq kómek kórsetetin dıabet ortalyqtary ashyldy. 2023-2025 jyldary Qaraǵandy, Atyraý jáne Saryaǵash qalalarynda dıabet ortalyqtaryn ashý kózdelgen», -dep atap ótedi Úkimet basshysy jaýabynda.

Onyń dereginshe, budan basqa elde jumys istep turǵan 130-ǵa jýyq memlekettik «Dıabet mektebi» (onyń ishinde «Dıabettik taban») jáne 19 jeke mektep bar.

«Qant dıabeti mektebi patsıentterdi qant dıabeti týraly durys aqparatpen qamtamasyz etedi. Patsıenttiń óz densaýlyǵyn saqtaýǵa jáne emdeýshi dárigerdiń usynymdaryn oryndaýǵa jaýapkershiligin jáne oǵan belsendi qatysýyn arttyrý úshin olardy yntalandyrady», - dedi Álıhan Smaıylov.