Elimizdiń ulttyq bilim berý júıesinde qazaq tiliniń damýyna qazirgi kezde keń jol ashylǵan - J.Túımebaev
ASTANA. Jeltoqsannyń 8-i. QazAqparat /Quralaı Orynbekqyzy/ - Elimizdiń ulttyq bilim berý júıesinde qazaq tiliniń damýyna qazirgi kezde keń jol ashylǵan. Bul týraly búgin QR Bilim jáne ǵylym mınıstrliginde ótken respýblıkanyń jalpy bilim beretin mektepterindegi memlekettik jáne aǵylshyn tilderin oqytý sapasyn arttyrý máselelerine arnalǵan respýblıkalyq keńeste atalmysh vedomstvo basshysy Janseıit Túımebaev aıtty,
dep habarlaıdy QazAqparat tilshisi.
«Qazaq tili men ádebıetiniń mektepte oqytylý jaıy búkil qazaq halqynyń ǵana emes, barsha qazaqstandyqtardyń nazarynda tur. Elbasynyń tapsyrmasymen ázirlenip, qazirgi kezde halyqtyń talqylanýyna usynylǵan Qazaqstannyń «El birligi doktrınasynda" qazaq tilin damytýǵa úlken oryn berilip, bilim berý salasynda jastardyń qazaq tilin tereń meńgerýge umtyldyrý júıesin qalyptastyrý, qazaq tiliniń mektepke deıingi mekemelerde, mektepter men joǵary oqý oryndarda oqytý sapasyn jaqsartý máseleleri qamtylǵan. Elimizdiń ulttyq bilim berý júıesinde qazaq tiliniń damýyna qazirgi kezde keń jol ashylǵan», dedi mınıstr.
J.Túımebaevtyń aıtýynsha, jyldan jylǵa qazaq tilinde bilim beretin uıymdar jelisi úzdiksiz ósýde. «Qazirgi kezde elimizde jalpy bilim beretin mekteptiń 50,3 paıyzy qazaq tilinde oqytady. Qazaq mektepteri qatarynyń ósýine qaraı qazaq tilinde bilim alatyn oqýshylardyń da sany artyp otyr. Qazirgi kezde olardyń sany eldegi barlyq oqýshylardyń 62 paıyzyn quraıdy», dedi ol.
«Qazaq tiliniń damýyna, qazaq tilinde bilim alǵan oqýshylardyń jeke tulǵa retinde qalyptasýyna qatysty negizgi tetik muǵalimderdiń qolynda, olardyń bilimi men biliktiliginde, kásibı sheberliginde, memleket pen halyq aldyndaǵy azamattyq paryzyna degen jaýapkershiliginde tur. Alaıda memlekettik tildi oqytý protsesinde eleýli kemshilikter bar. Jekelegen muǵalimderdiń oqý-ádistemeliginiń álsizdigi, jańa tehnologııalardy meńgerý deńgeıiniń, kásibı daıarlyǵynyń jetkiliksizdigi oqýshy biliminiń sapasyna keri áserin tıgizip otyr. Mektepterde elektrondyq oqýlyqtar bolǵanymen, muǵalimder ony tolyq paıdalanbaıdy», - dep atap ótti vedomstvo basshysy.
