Elimizdiń týyn bıik ustaıtyn sportshy ári bapker bolǵym keledi – búgin 18-ge tolǵan saılaýshy
- Álısultan, týǵan kúnińmen, dál búgin 18-ge tolǵan ekensiń, qazirgi kóńil-kúıiń qalaı?
- Jaqsy. Tańmen ertemen ákem ekeýmiz daýys berýge barǵan kezde erekshe sezimge bólendim. Óıtkeni eldegi ózekti máselelerdi sheshýge meniń daýsym da septigin tıgizip jatsa, ekinshiden, jaýapkershilik júgin sezindim.
Ózim M.Ótemisov atyndaǵy Batys Qazaqstan ýnıversıtetiniń 1 kýrsynda dene tárbıesi pániniń muǵalimi mamandyǵyna oqyp jatyrmyn. El namysyn abyroımen qorǵap, qazaqtyń kók baıraǵyn bıikte jelbiretetin sportshylar ǵoı.
Sondyqtan men de ataqty sportshylar men olardy jattyqtyryp, shyńdaıtyn bapkerlerge uqsaǵym keledi. Maqsatym – osy oqý ornyn támamdap, bilikti jattyqtyrýshy bolý.
- Ákeń Áskerbek Nurmuhanovtyń kezinde sambo, dzıýdo, qazaq kúresinen Qazaqstan birinshiliginiń júldegeri atanǵan óńirge tanymal sportshy ekendigi belgili. Qazirgi kezde BQO múmkindigi shekteýli adamdarǵa arnalǵan sport klýbynyń dırektory qyzmetin atqarýda. Osy jolǵa túsýińe ákeń de yqpal etken shyǵar?
- Iá, ákemniń ómir joly maǵan qashanda úlgi. Onyń ústine ózimniń de sportqa degen ynta-yqylasym joǵary. Jalpy, óz deneńdi shynyqtyryp, myqty bolǵanǵa ne jetsin!
- Ózińniń de tabys-jetistikteriń bar shyǵar?
- Men sý dobymen aınalysamyn. 2019 jyly Qazaqstan quramasy sapynda shaǵyn sý dobynan VІІ halyqaralyq TMD mektep sporty festıvalinde ekinshi orynǵa ıe boldym.
- Baýyrlaryń da sportpen shuǵyldana ma?
- Otbasynda alty uldyń úlkenimin. Menen keıingi Sanjar sambomen, Ermahan aýdaryspaqpen aınalysady. Anam Aızada Ersaıynqyzynyń mamandyǵy – psıholog, qazir kishkentaı inimmen úıde otyr. Kelesi jyly inim bir jasqa tolǵannan keıin, buıyrsa, «Kúmis alqa» ıegeri atanady.
Jalpy, otbasynda ulttyq sport pen tárbıege erekshe mán beriledi. Memlekettik tilde sóıleý, ata-baba saltyn qadirleý qajettigin qulaǵymyzǵa quıyp otyrady.
- Álısultan, áńgimeńe kóp rahmet. Bolashaqta ómirden óz ornyńdy taýyp, elimizdiń damýyna súbeli úles qosatyn azamat atanýyńa tilektespin.
Eske sala keteıik, budan buryn Ulttyq ulannyń 18-ge tolǵan sarbazdary referendýmda daýys bergenin jazǵan bolatynbyz.
Sondaı-aq oraldyq ǵalym ult bolashaǵyn oılaıtyn urpaǵy úshin qýanǵanyn jetkizdi.
Batys Qazaqstanda 91 jastaǵy tyl ardageri óz tańdaýyn jasady.
