Elimizdiń turaqtylyǵy úshin daýys berdim - Eńbek Eri Quralaı Baımenova

AQTÓBE. QazAqparat - Aqtóbe qalalyq sal aýrýyna shaldyqqan azamattardy qoldaý ortalyǵynyń tóraıymy, Eńbek Eri Quralaı Baımenova turaqtylyq úshin daýys berdi, dep habarlaıdy QazAqparat tilshisi.

Óńirde múmkindigi shekteýli azamattardyń daýys berýi úshin taksı qyzmeti jumys istep tur. Alǵashqylardyń biri bolyp Aqtóbe qalalyq sal aýrýyna shaldyqqan azamattardy qoldaý ortalyǵynyń tóraıymy, Eńbek Eri Quralaı Baımenova óz ýchaskesine baryp, daýys berdi.

«Men turaqtylyq, beıbitshilik úshin daýys berdim. Sebebi men balalarym men nemerelerimniń jaıly ómirine alańdap, tańdaý jasadym. Saılaýǵa qatysý, tańdaý jasaý osy úshin de mańyzdy. Ár kandıdattyń baǵdarlamasymen tanysyp, ózime jaqynyna daýys berdim», - dedi Eńbek Eri Quralaı Baımenova.
Aıta keteıik, Aqtóbe oblysynda 529 saılaý ýchaskesi bar. Aqtóbe aýmaqtyq saılaý komıssııasynyń habarlaýynsha, óńirde 568 myńnan astam saılaýshy tirkelgen.