Elimizdiń túkpir-túkpirinde 1500 oqýshy bir mezette kúı tartyp, fleshmob ótkizdi
PETROPAVL. QazAqparat - Qazaqstannyń barlyq qalalarynda QR Tuńǵysh Prezıdenti merekesine jáne «Nazarbaev Zııatkerlik mektepteri» derbes bilim berý uıymynyń 10 jyldyq mereıtoıyna oraı «Uly dala muragerleri» atty dombyrashylar fleshmoby ótti. Elimizdiń túkpir-túkpirinde bir mezette 1500 dombyrashy qazaqtyń kúılerin oryndady, dep habarlaıdy QazAqparat.
«Uly dala muragerleri» atty dombyrashylar fleshmoby Petropavlda «Sıtı-Moll» saýda ortalyǵynda ótti. Qazaqtyń kúıin áýelete oryndaǵan balalar saýda úıine kelýshilerdiń nazaryn ózderine aýdardy.
«Jalpy is-sharany uıymdastyrýdaǵy maqsat óskeleń urpaqqa patrıottyq tárbıe berý, qazaq halqynyń qasıetti dombyrasyn nasıhattaý. Ereksheligi jyl sanap dombyrashylar sany artyp kele jatyr. 70-ke jýyq bala búgin kúı oınasa, 150-ge jýyq oqýshy men mektep qyzmetkerleri, ata-analar ony kórýge keldi», - deıdi Nazarbaev Zııatkerlik mektebiniń ustazy Baqyt Nurysheva.
Fleshmobqa qatysýshylar Qurmanǵazynyń «Saryarqa», «Adaı», «Balbyraýyn» jáne Nurǵısa Tilendıevtiń «Ata tolǵaýy» men «Álqıssa» kúılerin oryndady.
«Qazaqtyń órimdeı ul-qyzdary qoldaryna qazaqtyń dombyrasyn alyp, saýda úıinde qazaqtyń án-kúıin áýeletip jatyr. Tamasha kórinis. Rýhyńdy kóteredi. Ultymyzdyń ónerine degen suranystyń artyp jatqany, jastardyń oǵan den qoıǵany árıne jaqsy. Saýda úıiniń úshinshi qabatynda ketip bara jatyp, dombyra únin estigende, eriksiz sol jaqqa qaraı bet aldym. Kóńilimdi bir kóterip tastady», - deıdi Petropavl turǵyny Zeınep Amanjolova.
Zııatkerlik mektep Petropavlda 2015 jyly ashyldy. Daryndy balalardyń basyn qosqan bilim ordasy oqýshylarynyń tárbıesine de asa mán beredi. Al, qazaqtyń dombyrasy men kúılerin nasıhattaýdy maqsat etken sharany oqý orny osymen tórtinshi jyl qatarynan ótkizip keledi.
