Elimizdiń tórt oblysynda un men nan baǵasy negizsiz kóterilgen - is sotqa jiberildi
ASTANA. 23 shilde. QazAqparat - Elimizdiń tórt oblysynda un men nan baǵasy negizsiz kóterilgen. Bul týraly búgin Úkimet otyrysynda QR Básekelestikti qorǵaý agenttiginiń tóraǵasy Ǵabıdýlla Ábdrahımov málim etti.
Onyń atap ótýinshe, agenttik Pavlodar, Ońtústik Qazaqstan Mańǵystaý, Batys Qazaqstan oblystarynda, sonymen qatar Astana qalasynda un men nan baǵasynyń kóterilýin tirkegen. Baǵa, ásirese Pavlodar oblysynda nanǵa, al Batys Qazaqstan oblysynda unǵa kúrt ósken. Qazirgi ýaqytta quzyrly vedomstvo bir bólke nannyń baǵasyn 41-den 47-i teńgege kótergen Pavlodar nan kombınatyna qatysty tergeý amaldaryn júrgizýde. Kompanııa baǵany kóterý úshin túrli qıturqy áreketterge baryp otyr. Tergeý barysynda elektr energııasy men janarmaı baǵasyna ketken shyǵyndardy eseptegende nan baǵasynan 2,5 paıyzdan artyq bolmaǵan.
«Osylaısha negizsiz baǵa kóterý aıqyn bilinip otyr. Tergeý amaldary aıaqtalǵannan keıin bul isti biz atalǵan kompanııaǵa aıyppul salý qoldaýhatymen sotqa joldadyq», - dedi ol.
Sonymen qatar agenttik Batys Qazaqstan oblysynda unnyń baǵasyn kótergen úsh kompanııaǵa qatysty tergeý amaldaryn júrgizýde. Máselen, Ǵ.Ábdrahımovtyń aıtýynsha, «Jelaev nan ónimderi kombınaty» joǵary surypty undy - 40, birinshi surypty - 57, ekinshi surypty 47 paıyzǵa qymbattatqan. Bul rette kompanııa óz áreketterin maýsym aıyndaǵy astyq tonnasynyń 1250 teńgege kóterilýmen túsindiredi.
«Al tekserý satyp alý baǵasynyń ne bári 4 paıyzǵa ǵana óskenin kórsetti. Al kombınat un baǵasyn 40-tan 57 paıyzǵa deıin qymbattatqan. Sonymen qatar bul sýbektide tonnasyn 29500 teńgeden satyp alǵan shamamen 6 myń tonna astyq bar. Bul un baǵasynyń negizsiz óskendigin kórsetedi. Osy fakti boıynsha is sotqa jiberildi», - dedi agenttik basshysy.
