Elimizdiń tatýlyq pen turaqtylyqtyń berekeli beketine aınalýynda Qazaqstan halqy Assambleıasynyń qosyp otyrǵan úlesi súbeli - B.Maıqanov
ASTANA. 16 sáýir. QazAqparat /Gúlmıra Álıakparova/ - Elimizdiń tatýlyq pen turaqtylyqtyń berekeli beketine aınalýynda Qazaqstan halqy Assambleıasynyń qosyp otyrǵan úlesi súbeli. Bul pikirin S.Seıfýllın atyndaǵy Qazaq agrotehnıkalyq ýnıversıtetiniń Ǵylymı jumystar jáne halyqaralyq baılanystar jónindegi prorektory Balǵabaı Maıqanov bildirdi.
Keshe Astanada atalmysh ýnıversıtettiń stýdentteri men qaladaǵy etno-mádenı berlestikterdiń «Birligimiz jarasqan!» uranymen ótkizgen kontserti barysynda sóz alǵan B. Maqanov: «Elimizdiń tatýlyq pen turaqtylyqtyń berekeli beketine aınalýynda Qazaqstan halqy Assambleıasynyń qosyp otyrǵan úlesi súbeli. Árıne, elimizdegi barlyq ult ókilderiniń shynaıy kelisim men yntymaq-birlikte turmys keshýi, eń aldymen, qazaq halqynyń ata-dástúri men tabıǵı keńpeıildigi, ulttyq diliniń keńdigi arqasynda ekendigin aıtqan jón. 1995 jyly Elbasy N.Nazarbaevtyń bastamasymen QR Prezıdenti janynan keńestik-konsýltatıvti organ retinde qurylǵan Qazaqstan halqy Assambleıasy qazirgi tańda etnosaralyq jáne konfessııaaralyq qatynastar salasyndaǵy memlekettik saıasatty júzege asyrýshy mańyzdy quralǵa aınalyp, elimizdegi barlyq etnosqa teń quqyqty qamtamasyz etýshi uıym rólin atqarýda», - dedi.
Onyń aıtýynsha, Assambleıa aıasynda birshama ıgi isterge qol jetkizilip, qoǵamdyq qorlar men etno-mádenı birlestikter Qazaqstan halqy ıgiligine aıanbaı qyzmet etip keledi.
«Halqymyz «Yrys - yntymaqqa jolyǵady, dáýlet - birlikpen tolyǵady» demekshi, taǵdyr tabystyrǵan, tarıh toǵystyrǵan túrli ult ókilderi ortaq Otanymyzdyń irgesin birge qalasyp, dostyǵymyz óz jarastyǵyn tabýda. Turaqtylyq pen tynyshtyq saltanat qurǵan Qazaqstannyń áleýeti men qýaty eselep arta bersin», - degen tilegimen túıindedi sózin JOO ókili.
