Elimizdiń tarıhı oqıǵalaryn álemge nasıhattaýdyń mańyzy zor - senator
«Memleket basshysy Qasym-Jomart Kemeluly Toqaevtyń «Táýelsizdik bárinen qymbat» degen maqalasy táýelsizdiktiń ǵasyrǵa sozylar 30 jyldyq tarıhyn shırata bilgen tarıhı mańyzy bar maqala bolyp otyr. Prezıdentimiz maqalasynda qansha ǵasyrlardan beri ata-babamyz ańsap kele jatqan táýelsizdiktiń el úshin qanshalyqty mańyzdy ekenin sanamyzda jańǵyrtyp otyr. Maqalada baǵdar men beles, tanym men taǵylym, qoǵam men qundylyqtar, ulaǵat pen ustanym baǵyttaryn qamtıtyn el táýelsizdigindegi keleli máselelerge jan-jaqty taldaý jasalǵan. Sonymen qatar bul maqala Elbasymyz Nursultan Ábishuly Nazarbaev salǵan táýelsizdiktiń dara jolyndaǵy 30 jyldyq tarıhqa kóz júgirtedi. Maqalada memleketimizdiń táýelsizdik jyldary ótken jolynyń tarıhı mańyzyna súıene otyryp, bolashaqta alynar asýlarǵa da erekshe mán beredi. Qazirgi kezeńde el ishinde ultjandylyqty qalyptastyrýda kınomatografııanyń da atqarar róli óte zor ekendigin atap kórsete otyryp, bolashaqta otandyq telearnalarǵa memlekettik tapsyrystyń belgili bir bóligin mindetti túrde tarıhı baǵyttaǵy fılmderdi túsirýge jumsaý kerektigin atap kórsetedi», - dedi senator.
Sonymen qatar D. Nóketaeva elimizdiń tarıhı oqıǵalaryn jalpy álem jurtshylyǵyna nasıhattaýdyń da úlken mańyzy bar ekenin atap ótti.
«Qazaq tarıhyndaǵy náýbetti jyldardyń biri bolyp sanalatyn 1921-1922 jyldardaǵy asharshylyqtyń alǵashqy kezeńine de ǵasyr tolǵanyna da toqtalyp, osy baǵytta aqtańdyqtardyń betin ashý úshin úlken is-sharalardy júzege asyrý qajettigi týyp otyrǵandyǵyn tilge tıek etedi. Sonymen qatar jańa tarıhymyzdaǵy belgili oqıǵalardyń biri bolyp tabylatyn jeltoqsan dúmpýiniń de 35 jyldyq tarıhyna erekshe mán berý kerektigin jáne onyń mańyzyn josparly túrde nasıhattaýdy negizgi mindetterdiń biri retinde aıqyndaıdy.
Qazaqstan álemde beıbit túrde alǵashqy memlekettiń biri retinde ıadrolyq qarýdan bas tartqan memleket ekendigi jáne Elbasynyń 1991 jyly Semeı polıgonyn jabýǵa baılanysty jarlyǵynyń qazirgi kezeńde álemdik deńgeıde erekshe mańyzǵa ıe bolǵandyǵy da atap ótilgen. Osy oqıǵany da halyq ishinde jalpy álem jurtshylyǵyna nasıhattaýdyń da úlken mańyzy bar ekendigi dáıekti derektermen naqtylap kórsetilgen. Memleket basshysy Qasym-Jomart Kemelulynyń «Halyq únine qulaq asatyn memleket» tujyrymdamasy men Ulttyq qoǵamdyq senim keńesi elimizde demokratııany tereńdetýge baǵyttalǵan shynaıy qadamdardyń biri bolyp sanalady. Elimizdiń, halyqtyń múddesin der kezinde eskerip sheshýge degen shynaıy mehanızm osy Prezıdentimiz usynyp otyrǵan ustanym ekendigin ýaqyt talaby kórsete túskendeı», - dedi depýtat.
