Elimizdiń syrtqy saıasattaǵy baǵytyn qazirgi zamandaǵy ózgeristerge qaraı sapaly beıimdeý mindeti mańyzdy - SІM
ASTANA. 27 mamyr. QazAqparat /Qanat Mámetqazyuly/ - Elimizdiń syrtqy saıasattaǵy baǵytyn qazirgi zamandaǵy ózgeristerge qaraı sapaly beıimdeý mindeti mańyzdy.
Búgin QR Cyrtqy ister mınıstrliginde ótken QR Parlamenti Májilisi Halyqaralyq ister, qorǵanys jáne qaýipsizdik komıtetiniń kóshpeli otyrysy barysynda syrtqy saıasat vedomstvosynyń basshysy Erjan Qazyhanov osylaı málimdedi.
"Qazaqstannyń egemen memleket retindegi qalyptasýy, onyń ornyqty áleýmettik-ekonomıkalyq damýy, saıası turaqtylyq pen syndarly syrtqy saıasaty elimizge qazirgi zamannyń tolyqqandy sýbektisi retinde bekı túsýine, Eýrazııalyq jáne jahandyq qaýipsizdiktegi mańyzdy baılanystyrýshy býyn retinde ornyǵýyna septigin tıgizdi. Sonymen qatar. Sońǵy jyldardaǵy iri saıası jetistikteri Astanaǵa jańa álemdik problemalarǵa aralasýǵa, jańa álemdik tártip qalyptastyrýǵa belsendi atsalysýǵa múmkindik berip otyr», - dep atap ótti kezdesý barysynda mınıstr.
Onyń aıtýynsha, eldiń aıqyndalǵan syrtqy saıasatyn júzege asyrý barysynda negizgi ekpin syrtqy saıasattyń kópvektorlylyqtan kópdeńgeılikke jáne kópjosparlylyqqa aýysyp otyr. «Búgingi kúni mınıstrliktiń qyzmeti halyqaralyq arenada oryn alyp otyrǵan tereń tektonıkalyq qozǵalystar aıasynda júzege asýda. 2011 jyldyń basynan beri biz barlyq derlik Taıaý Shyńys pen Soltústik Afrıka elderin jaılaǵan saıası, áleýmettik-ekonomıkalyq titirkenisterdiń kýási bolyp otyrmyz. Bundaı oqıǵalar búgingi tańda memlekettiń turaqtylyǵyna qatysty qaýip-qaterlerdiń jańa túr men jańa aýqymǵa engenin kórsetti. Halyqaralyq oqıǵalardyń alýantúrliligi men kúrdeliligi jaǵdaıǵa ýaqytyly baǵa berip, Qazaqstannyń múddesi úshin teńgerimdi sheshim qabyldaýdy qajet etedi. Sondyqtan da, búgingi kún tártibinde elimizdiń syrtqy saıasattaǵy baǵytyn qazirgi zamandaǵy ózgeristerge qaraı sapaly beıimdelý mindeti tur. Bul rette bizdiń strategııalyq basymdyqtardyń saqtalǵany oryndy», - deıdi E. Qazyhanov.
