Elimizdiń strategııalyq josparlaý júıesinde birqatar problemalar anyqtalyp otyr - J. Aıtjanova
ASTANA. Mamyrdyń 4-i. QazAqparat /Ernur Aqanbaı/ - Elimizdiń strategııalyq josparlaý júıesinde júrgizilgen jumystardyń jańashyldyǵyna baılanysty birqatar problemalar anyqtalyp otyr.
Bul týraly búgin Úkimet otyrysynda Ekonomıkalyq damý jáne saýda mınıstri Janat Aıtjanova málim etti, dep habarlaıdy QazAqparat.
«Tyńdaýlar kórsetkenindeı, strategııalyq josparlardy qalyptastyrýdyń ádistemelik bazasynda odan ári jetildirýdi talap etetin birqatar aspektiler bar», dedi otyrysta J. Aıtjanova.
Onyń sózine qaraǵanda, birinshiden, strategııalyq maqsattarǵa qol jetkizý dárejesin sıpattaýǵa tıisti maqsatty ındıkatorlar kóbinese memlekettik organdardyń aǵymdaǵy qyzmetterin qamtıdy. Ekinshiden, mindettelgen jalpyhalyqtyq maqsattarǵa qol jetkizý úshin memlekettik basqarý deńgeıleri arasynda jaýapkershilik dárejesi jetkiliksiz ajyratylǵan; keı-keıde strategııalyq josparlarda ákimdikter men ortalyq atqarýshy organdardyń jaýapkershilik salasy aralasyp ketken. Úshinshiden, birqatar strategııalyq josparlardaǵy maqsatty kórsetkishter ólsheýge qıyn sıpatta, kóbinese olardy sandyq turǵydan ólsheý múmkin emes. Tórtinshiden, strategııalyq josparlardyń tıimdi júzege asyrylýyna dúrkin-dúrkin túzetýlerdiń engizilýi de belgili bir deńgeıde teris áser etken. «Tek 2009 jyldyń ózinde bıýdjet 3 ret, al aǵymdaǵy jyly 1 ret túzetildi», dedi mınıstr.
Onyń sózine qaraǵanda, memlekettik organdardyń strategııalyq josparlaryn ázirleýdegi ádistemeni jetildirý úshin Ekonomıkalyq damý jáne saýda mınıstrligi strategııalyq josparlardy ázirleý jónindegi ádistemelik nusqaýlardy qalyptastyrý jónindegi jumysty bastap ketken. Onda aldyńǵy jyldardyń tájirıbesi eskeriletin bolady.
