Elimizdiń soltústik óńirlerine 1000-nan astam dáriger mamandar jetispeıdi
ASTANA. QazAqparat - Astana qalasy, Aqmola, Soltústik Qazaqstan jáne Qostanaı oblystaryna 1000-nan asa maman dáriger jetispeıdi. Bul týraly Astana medıtsına ýnıversıtetinde ótken 2013-2014 oqý jylynda bitiretin rezıdentterdi, ınternderdi jáne bakalavrıattardy jumysqa ornalastyrýǵa arnalǵan dástúrli «Bos oryndar jármeńkesinde» belgili boldy.
Ýnıversıtet baspasóz qyzmetiniń habarlaýynsha, bıylǵy oqý jylynda atalmysh ýnıversıtetti 561 maman támamdady. Túlekterdiń 97%-y jumys berýshilermen uzaq merzimdi kelisim jasasty, onyń ishinde Astana qalasyna - 47,8%-y, Aqmola oblysyna - 25%-y, Soltústik Qazaqstan oblysyna - 8,5%-y, Qostanaı oblysyna - 5,4%-y bólindi jáne 13,3%-y elimizdiń basqa óńirlerinde jumys jasaıtyn boldy.
Aıta keteıik, QR aımaqtyq ákimdikteriniń, Astana qalasy men respýblıka oblystary densaýlyq saqtaý basqarmalarynyń, medıtsınalyq mekemeleri basshylary men ókilderi qatysatyn «Bos oryndar jármeńkesi» boıynsha, Astana medıtsına ýnıversıtetine 2007 jyly 59 medıtsınalyq mekemeden suranys jasalsa, 2013 jyly mundaı mekemeler sany 122-ge jetken.
«2012 jyly túlekterimizdiń 97%-y jumyspen qamtylsa, 2013 jyly bul kórsetkish 98,5%-ǵa jetti. Medıtsınalyq mekemelerdiń bizdiń ýnıversıtet daıyndaǵan mamandarǵa degen suranysynyń jyldan-jylǵa artýy - jumysymyzdyń nátıjeli ekenin kórsetip otyr», - deıdi ýnıversıtettiń bilim berý qyzmeti jónindegi prorektory G. Jaqsylyqova.
