Elimizdiń segiz óńirinde joldar halyqaralyq IRAP júıesi boıynsha baǵalanýda

NUR-SULTAN. QazAqparat - Qazaqstanda jol qaýipsizdigin baǵalaýdyń InternationalRoadAssessmentProgramme halyqaralyq júıesin engizý júrgizilýde. Atalǵan joba bıylǵy jyldyń qańtarynan bastap Dúnıejúzilik banktiń qoldaýymen iske asýda. Ony QR IIDM Avtomobıl joldary komıteti, «SweRoad» kompanııasy jáne «Qazaqstan jol ǵylymı-zertteý ınstıtýty» birlesip júzege asyryp jatyr, dep habarlaıdy QazAqparat.

Búginge deıin «Qazjol ǴZI» AQ men «Jol aktıvteriniń ulttyq sapa ortalyǵy» RMK mamandary Aqmola, Soltústik Qazaqstan, Qostanaı, Aqtóbe, Qyzylorda, Túrkistan, Jambyl, Almaty oblystary jáne Almaty qalasynyń joldary men belgilerin arnaıy qurylǵyǵa túsirip, baǵasyn bergen.

Joba aıasynda 25 ulttyq sarapshy oqytýdan ótip jatyr. Olar joldardy derbes baǵalaýda. Avtomobıl joldarynyń qaýipsizdigine tolyq ári naqty baǵa berý úshin jol júıesi ár 100 metr saıyn 50 parametr boıynsha kodtalýda. Jolshylar osylaısha 5700 shaqyrym joldy zerttep úlgergen. Atap aıtsaq, bul – «Batys Eýropa – Batys Qytaı» dálizi, sondaı-aq «Nur-Sultan – Petropavl», «Nur-Sultan – Atbasar», «Qostanaı – Qarabutaq», «Shymkent – Sarayǵash», «Almaty – Taldyqorǵan» avtojoldary. Jalpy barlyǵy 6200 shaqyrym joldy baǵalaý josparlanypty.

Kodtaý úrdisi aıaqtalǵannan keıin, joldyń ár ýchastkesine IRAP standarttary men nusqaýlaryna sáıkes bes baldyq juldyzshalar reıtıngi beriletin bolady. Bul óz kezeginde qaýipsizdik kórsetkishterin jaqsartyp, jol-kólik oqıǵalaryn azaıtýǵa septigin tıgizedi.

Joba jol júrý qaýipsizdigin jaqsartý boıynsha ınvestıtsııalyq jospardy jáne IRAP ozyq bilimderiniń ulttyq platformasyn qurýǵa múmkindik bermek. Budan bólek, atalǵan júıeni ulttyq zańnamaǵa engizý boıynsha egjeı-tegjeıli usynystar ázirleý kózdelgen.

Joldardy baǵalaýdyń halyqaralyq júıesi Ortalyq Azııa elderi men TMD alǵash ret Qazaqstanda engizilip jatqanyn aıtyp ótken jón. Atalǵan baǵdarlama boıynsha baǵalaý búginge deıin 100-den astam memlekette júzege asqan eken.