Elimizdiń sanıtarııalyq-epıdemıologııalyq qyzmeti tsıfrlyq júıege kóshedi

NUR-SULTAN. QazAqparat – QR Sanıtarııalyq-epıdemıologııalyq baqylaý komıteti sanıtarııalyq-epıdemıologııalyq qyzmetterdi tsıfrlandyrýdyń 2021-2023 jyldarǵa arnalǵan tujyrymdamasyn ázirledi, dep habarlaıdy QazAqparat tilshisi.

«2021-2023 jyldary júzege asyrýǵa arnalǵan kontseptsııada sanıtarııalyq-epıdemıologııalyq qadaǵalaý jumystaryn avtomattandyrýdyń tıimdilikteri jan-jaqty qarastyrylǵan. Tujyrymdama aıasynda Mamandardyń sanıtarlyq-gıgıenalyq qadaǵalaý, tehnıkalyq reglament, taldaý bólimderiniń qyzmetterin tsıfrlandyrý kózdelgen», - dep jazady komıtettiń resmı saıty.

Sanıtarııalyq-epıdemıologııalyq qyzmetti tsıfrlandyrý arqyly óńirlerdegi sanıtarııalyq-epıdemıologııalyq jaǵdaıdy obektıvti taldaý, halyqtyń sanıtarııalyq-epıdemıologııalyq salamattylyǵyn qamtamasyz etý boıynsha kásiptik baǵalaý jáne tıisti basqarýshylyq sheshimder qabyldaýǵa jol ashý kózdelip otyr.

«Qazir basty problemalardyń biri – komıtet pen onyń aýmaqtyq bólimshelerin, vedomstvolyq baǵynysty uıymdaryn qamtıtyn aqparatty, qujat aınalymyn, óńdep, saqtaıtyn biryńǵaı avtomattandyrylǵan júıe joq. Sonyń kesirinen qujattardy óńdeý, qyzmettik tekserý, mamandar qyzmetin úılestirý men baqylaýdyń merzimderi, reglamenti saqtaý qıyn. Aýmaqtyq departamentter men vedomstvolyq baǵynysty uıymdar málimetterdi áli kúnge deıin e-mail arqyly joldaıdy. Ortaq tsıfrlyq júıe qalyptaspaǵandyqtan aqparatty óńdeý, derekterdi daıyndaý, qyzmet kórsetý barysynda kedergiler týyndaıdy», - dep túsindiredi komıtet mamandary.

Mınıstrliktiń málimeti boıynsha, TMD aýmaǵynda Reseı Federatsııasy men Belarýs bul salada avtomattandyrylǵan júıege kóshken.

«Sondaı-aq, Polshanyń tájirıbesin atap ótýge bolady, onda sanıtarlyq-epıdemıologııalyq stantsııa jobasyn iske asyrý merzimi 2004-2006 jyldar aralyǵynda pılottyq baǵdarlamanyń qajettilikteri úshin juqpaly aýrýlardyń derekterin taldaıtyn GISK-NET arnaıy júıesi jasaldy», - delingen resmım aqparatta.