Elimizdiń ortalyq jáne soltústik aımaqtarynda úsik júredi
NUR-SULTAN. QazAqparat - Sáýirdiń 25-inen bastap elimizdiń ortalyq jáne soltústik oblystarynda túnde -5 gradýsqa deıin sýyq bolady. Bul týraly Ortalyq kommýnıkatsııalar qyzmetindegi brıfıngte «Qazgıdromet» RMK gıdrologııa departamentiniń dırektory Dıdar Jánibekuly aıtty, dep habarlaıdy QazAqparat tilshisi.
«Aýa raıynyń jylynýyna baılanysty taýdaǵy qar erıdi. Mundaı jaıt Almaty oblysynda sel júrý qaýpin týdyrady. Buǵan qosa, mamyr aıynda aýa temperatýrasy normadan joǵary bolmaq ári sý tasqyny qaýpin ulǵaıta túsedi. Mamyrdyń aýa raıy boljamyna toqtalsam, bul aıda eldiń ońtústik-batys bóliginde kún jyly, jaýyn-shashyn az túsedi. Al soltústik-shyǵys bóliginde salqyn bolyp, normamen shamalas nemese odan kóp jaýyn-shashyn kútiledi. Sonymen qatar ekpini sekýndyna 15-20 metrge jetetin jel soǵýy yqtımal», - dedi ol.
Onyń dereginshe, sáýirdiń 25-ine deıin búkil el aýmaǵynda kún jyly bolady. Odan keıin 25 sáýirden bastap elimizdiń ortalyq jáne soltústik oblystarynda túnde -5 gradýsqa deıin sýyq túsedi.
«Al odan keıin birtindep kún jylyna bastaıdy», - dedi Dıdar Jánibekuly.
