Elimizdiń ońtústik shebinde 15 zastava salynyp jatyr - Ulttyq qaýipsizdik komıteti
ASTANA. Aqpannyń 11-i. QazAqparat - Ózbekstan Respýblıkasymen jáne Qyrǵyz Respýblıkasymen aradaǵy memlekettik shekara - negizgi jáne kúrdeli baǵyttardyń biri. Shekaranyń bul ýchaskesiniń ereksheligi sol, ol aýmaqtar jaılylandyrylmaǵan.
Shekara bólimsheleri kóbine beıimdelmegen jaılarda ornalasqan. 2008 jyly elimizdiń ońtústik shebinde bolǵan kezde Elbasy N.Nazarbaev Ulttyq qaýipsizdik komıtetiniń Shekara qyzmetine olardy ári qaraı bekitý jónindegi mindet qoıǵan edi. Qazirgi tańda ońtústik shepte 15 shekara zastavasy salynyp jatyr, dep habarlady Shekara qyzmetiniń baspasóz qyzmetinen.
«Ońtústik» aımaqtyq basqarmasynyń áskerı qyzmetkerleri 2009 jyly memlekettik shekarany buzǵan 5 myńnan astam adamdy ustady. 1 031 kontrabandalyq faktiniń joly kesildi, onyń ishinde 76 oqıǵa - esirtki kontrabandasymen baılanysty. Sondaı-aq, 205 tonna un jáne 54 tonna astyq, 450 tonnadan astam halyq tutyný taýarlary men 754 tonnadan astam kókónis kontrabadasynyń joly kesildi.
Ońtústik baǵyttaǵy shekara kúzetin kúsheıtý úshin Shekara qyzmeti 2007-2009 jyldar aralyǵynda birqatar sharalar atqardy, atap aıtqanda: Jetisaı shekara otrıadyn jasaqtady, «Lengir», «Qordaı» jeke shekara komendatýralary quryldy, qosymsha eki shekara zastavasy qoıyldy, jeke ınjenerlik-saperlyq batalon jasaqtaldy, jalpy uzyndyǵy 395 shaqyrymdy quraıtyn bekinis qorshaýlary jabdyqtaldy, Saryaǵash baǵytynda shekaranyń 15 shaqyrymy beınebaqylaýdyń tehnıkalyq quraldarymen jabdyqtaldy, Beıneý baǵytynda 4 tehnıkalyq baqylaý beketi qoıyldy.
Al 2010 jyly ońtústik shekaranyń 392 shaqyrymynda ınjenerlik qorshaýlar ornatý, sondaı-aq qoldanystaǵy qorshaýlardy dabyl keshenderimen kúsheıtý, sóıtip, memlekettik shekaranyń 430 shaqyrymyndaǵy kúzettiń tıimdiligin arttyrý josparlanýda.
